Порахўрлик жинояти иштирокчилари муддатидан илгари озод қилинмайди

Ўзбекистонда пора олган, пора берган ва пора олди-бердисида воситачилик қилган шахсларни жазо ўташдан муддатидан илгари шартли озод қилиш тақиқланади. Тегишли қонун 13 июн куни Сенат томонидан маъқулланди.

Қонун билан Жиноят кодексига “коррупцияга оид жиноятлар” деган янги атама киритилиб, коррупцияга оид жиноятларнинг аниқ рўйхати белгиланмоқда. Бу билан терминологик чалкашликларга барҳам берилади.

Бундан ташқари, пора олиш, пора бериш ва бу жараёнда воситачилик қилганлик учун ҳукм қилинган шахсларга нисбатан жазодан муддатидан илгари шартли равишда озод қилиш институтини қўллаш тақиқланяпти.

Шунингдек, хизмат мавқейидан фойдаланган ҳолда содир этилган фирибгарлик – Жиноят кодексининг 168-моддаси учинчи қисмидан тўртинчи қисмига ўтказилди. Бу билан мазкур қилмиш учун энг оғир санкция энди 8 йилгача эмас, 10 йилгача озодликдан маҳрум қилишни назарда тутади.

Нодавлат (хусусий) ташкилот хизматчисини пора эвазига оғдириб олиш жинояти учун ҳам жавобгарлик кучайтирилмоқда.

Жиноят кодексининг бир қатор моддаларида қилмишнинг “ғаразгўйлик ниятларида” содир этилиши – жазони оғирлаштирувчи янги квалификация белгиси сифатида белгиланмоқда.

Давлат бошқаруви тизимида функциялар такрорланишининг олдини олиш мақсадида “Ўзбекистон Республикасининг Ҳисоб палатаси тўғрисида”ги қонунга ўзгартириш киритилди ва Ҳисоб палатасининг коррупцияга қарши ички назорат (комплаенс-назорат) тизими жорий қилиниши устидан назорат қилиш вазифаси бекор қилинди.

Маъмурий жавобгарлик тўғрисидаги кодексда эса давлат харидлари ва бюджет тизимидаги қонунбузилишлар учун санкциялар кучайтирилди.

Сенаторларнинг фикрича, мазкур қонуннинг ҳаётга татбиқ этилиши жиноятлар учун жазо муқаррарлигини таъминлашга хизмат қилади.

Сенаторлар қонунни маъқуллади.