Песков: Ядро қуролидан фойдаланиш шартларини ҳарбийлар белгилайди

Россия Федерациясининг янгиланган ядровий доктринасига мувофиқ Россия томонидан ядро қуролидан фойдаланиш шартлари Россия Мудофаа вазирлиги томонидан белгиланиши керак. Бу ҳақда 29 сентябр, якшанба куни Россия президенти Владимир Путиннинг матбуот котиби Дмитрий Песков «Россия 1» телеканали мухбири Павел Зарубинга берган интервюсида маълум қилди.

Унинг сўзларига кўра, россиялик ҳарбийлар «қайси қуроллар қўлланаётгани ва улар қандай қўлланаётганини (Украинадаги урушда) яқиндан кузатиб боради» ва «эътиборни сусайтирмайди». Песков журналистнинг Путин томонидан айтилган ядро қуролидан фойдаланиш учун баъзи шартлар аллақачон мавжуд эканлиги ҳақидаги сўзларига шундай изоҳ берди.

Песков шунингдек, «аслида, ядровий кучлар Украина атрофидаги можарода Украина томонида иштирок эта бошлаганини» таъкидлади ва Кремлнинг «НАТО инфратузилмаси Россия чегараларига яқинлашаётгани» ҳақидаги позициясини такрорлади — гўё буларнинг барчаси «ядровий доктринага ва ядровий тўсиқ бўлиш соҳасидаги давлат сиёсати асосларига тузатишлар киритишни талаб этган». Путин матбуот котибининг сўзларига кўра, бундай тузатишлар аллақачон тайёрланган ва шакллана бошлаган.

Ядровий таҳдидлар

Ўтган ҳафта Путин Россия мамлакатга оммавий ҳаво зарбалари берилган тақдирда ядро қуролидан фойдаланиши мумкинлиги билан таҳдид қилди. Шунингдек, у ядровий давлат кўмагида Россияга қилинган ҳар қандай ҳужум Россия Федерациясига қўшма тажовуз сифатида баҳоланиши мумкинлиги ҳақида огоҳлантирди.

Аввалроқ Россия президенти Россияга қарши Ғарбнинг узоқ масофали аниқликдаги қуролларини қўллаш НАТО давлатларининг урушда бевосита иштирок этишини англатишини айтган эди. Украина президенти Володимир Зеленский бир неча ойдирки, бундай қуролларни Россия ҳудудига чуқур зарбалар бериш учун ишлатишга рухсат сўраб келади.

Европа Иттифоқи ва Қўшма Штатлар Путиннинг ядровий таҳдидларини қоралаб, уларни масъулиятсизлик деб атади.