Россияда ўзбек диаспораси етакчиси ноқонуний миграцияни ташкил этишда гумон қилинмоқда

Гумондорлар пул мукофоти эвазига рус тилини билиш, Россия тарихи ва қонунчилиги асослари бўйича сертификатларни чет эл фуқароларига бериб келган.

Фото: Видеодан кадр

Россиянинг Иркутск шаҳрида ўзбек ва тожик диаспораси етакчилари ноқонуний миграцияни ташкил қилишда гумон қилиниб, қўлга олинди. Бу ҳақда Иркутск области ИИВ хабар берди. Гумондорларнинг исми-шарифи хабарда келтирилмаган.

Қайд қилинишича, жорий йилнинг январ ойидан бошлаб «Узбекский национально-культурный центр «Наше Отечество» раиси ва тожик диаспораси раиси ўринбосари қўшимча таълим маркази билан ҳамкорликда пул мукофоти эвазига рус тилини билиш, Россия тарихи ва қонунчилиги асослари бўйича сертификатларни чет эл фуқароларига бериб келган. Бу сертификатлар Ички ишлар вазирлигининг миграция органларига тақдим этиш учун мўлжалланган.

Таъкидланишича, хорижликларнинг кўпчилиги бундай билимларга эга бўлмаган. Ушбу жиноий ҳаракатлар меҳнат патентини, шунингдек, Иркутск областида яшаш учун рухсатномани рўйхатдан ўтказишга ёрдам берган.

Маълум бўлишича, рус тилини билишини тасдиқловчи сертификат учун гумондорлар 8 минг рублга яқин пул олган ва бунинг ортидан 1,5 миллион рублдан ортиқ даромад топган.

Гумондорларнинг ишхонаси ва яшаш манзилларида тинтув ўтказилганда, компютерлар, флеш-карталар, 1,7 миллион рубл, банк карталари, бўш патронлар ва далилий аҳамиятга эга бўлган ҳужжатлар олиб қўйилган.

Ҳолат юзасидан Россия Жиноят кодексининг «Тижорат порахўрлиги», «Ноқонуний миграцияни ташкил этиш» моддалари билан жиноят иши очилиб, гумондорларга нисбатан қамоққа олиш тарзидаги эҳтиёт чораси қўлланган.