Саҳройи Кабирда кучли ёғингарчилик — фотосуратлар

Марокаш Метеорология бош бошқармаси ходимининг маълум қилишича, 30-50 йилдан бери қисқа муддат ичида бунчалик кўп ёғин кузатилмаган.

Марокаш шарқидаги Мерзуга қишлоғи. Фото: AP / Scanpix / LETA

Associated Press агентлиги Марокаш жануби-шарқидаги Саҳрои Кабир чўлида кузатилган кучли ёмғирдан кейинги суратларни эълон қилди.

Қайд этилишича, дунёнинг энг қурғоқчил жойларидан бирида кўп миқдорда ёмғир ёғган. Марокаш ҳукуматининг ҳисоб-китобларига кўра, сентябр ойида бир нечта туман, жумладан, Тата шаҳрига икки кунда ўртача бир йилда кузатиладиган ёмғир ёғган (ўртача йиллик кўрсаткич — 250 миллиметрдан кам).

Марокаш пойтахти Работдан 450 километр жанубда жойлашган Тагуните қишлоғида бир суткада 100 миллиметрдан ортиқ ёғин кузатилган. Мамлакат Метеорология бош бошқармаси ходими Хуссин Юабебнинг маълум қилишича, 30-50 йилдан бери қисқа муддат ичида бунчалик кўп ёмғир ёғмаган.

Агентлик суҳбатдошининг айтишича, ушбу циклон туфайли яқин ой ва йилларда минтақада об-ҳаво ўзгариши мумкин — ҳаводаги намлик ҳисобига буғланиш ортади, бу эса янги ёғингарчиликни келтириб чиқаради. Таъкидланишича, Марокаш ва Жазоирда сентябр ойи бошида 20 дан ортиқ киши ёғингарчилик қурбонига айланган.