Песков BND раҳбарининг РФ НАТО учун хавфли экани ҳақидаги баёнотини рад этди

Россия президенти матбуот котиби Дмитрий Песков Германия Федерал разведка хизмати (BND) раҳбари Бруно Калнинг Россия энг кўпи билан ҳозирги ўн йиллик охирига қадар «НАТОга ҳужум уюштира олиши» ҳақидаги даъволарини рад этди. Песков 14 октябр, душанба куни Москвада Калнинг баёнотларини мантиқсиз деб атади. «Интерфакс» агентлиги Владимир Путин вакилининг сўзларидан иқтибос келтирди.

«Россия ўзининг ҳарбий инфратузилмаси билан ҳеч қачон НАТО томонга қараб ҳаракатланмаган», — дея таъкидлади у алянснинг «кенгайиш тўлқинлари» ва унинг ҳарбий инфратузилмасининг Россия чегараларига яқинлашиши ҳақида гапириб.

«Шунинг учун, бу ерда Россия қуролли кучлари кимгадир хавф туғдиради, дейиш мутлақо нотўғри, мантиққа тўғри келмайди ва энг муҳими, биз ҳозир бирга бошдан кечираётган қарама-қаршиликка олиб келган бутун тарихга зиддир». — деди Песков.

Германия разведка хизмати раҳбари РФдан келаётган ҳарбий хавфга ишора қилди

Федерал разведка хизмати (BND) раҳбари Бруно Кал Россиядан келаётган эҳтимолий ҳарбий таҳдидга ишора қилди. 14 октябр куни у Германия Бундестагининг разведка хизматлари фаолиятини мониторинг қилиш қўмитаси олдида сўзлаган нутқида: «Энг камида шу ўн йилликнинг охирида Россия қуролли кучлари НАТОга ҳужум қила олади», деди.

Калнинг сўзларига кўра, «Кремл Германия Федератив Республикасини душман деб билади». «Биз Россия билан тўғридан тўғри зиддиятдамиз», — дея таъкидлади у ва Германия Россиянинг тажовузидан ўзини ҳимоя қилиш учун Украинага кўрсатаётган ёрдам миқдори бўйича дунёда АҚШдан кейин иккинчи ўринда эканлигини таъкидлади. Германия разведка хизмати раҳбари нуқтайи назарига кўра, Россия президенти Владимир Путин учун гап нафақат Украина , балки «аслида янги дунё тартибини яратиш ҳақида кетяпти».