Зеленский КХДРни урушда Россия томонида қатнашишда айблади

Украина президенти Володимир Зеленский 16 октябр, чоршанба куни Олий рададаги нутқида «ғалаба режаси» тақдимоти олдидан Шимолий Корея қўшинларининг Украинага қарши агрессив урушда Россия томонида бевосита иштирок этгани ҳақидаги тасдиқланган фактларни маълум қилди. «РФ раҳбарияти бошчилигидаги «ҳужумчилар коалицияси» ҳозирда 20 миллион корейсни гаровда ушлаб турган Ким оиласи бошчилигидаги Шимолий Кореяни ўз ичига олади, бизнинг разведка хизматларимиз нафақат КХДРдан Россияга қурол-яроғ, балки одамлар ҳам ўтказилганини қайд этяпти», — дейди Зеленский.

Украина президентининг аниқлик киритишича, гап «урушда ҳалок бўлган Россия фуқаролари ўрнига Россия заводларининг ишчилари» ва «Россия армияси ходимлари» ҳақида бормоқда. «Ва бу факт. Аслида, бу иккинчи давлатнинг Украинага қарши урушда Россия томонида иштирок этиши», — дея таъкидлади Зеленский. У шунингдек, Эрон режимининг РФга тўғридан тўғри ёрдами ҳақида гапирди. Украина президенти Россия Федерацияси ва Хитой ўртасидаги ҳамкорлик ҳам давом этаётганини айтди. «Баёнотлардан фарқли ўлароқ, Пекин РФ раҳбариятини, унинг тажовузкорлигини ва БМТ Низоми бузилишини тўхтатиш учун ҳақиқий қадамлар қўйишдан тийилмоқда», — деди Зеленский.

Путин Думага КХДР билан ҳарбий ҳамкорлик тўғрисидаги қонун лойиҳасини киритди

Россия президенти Владимир Путин Давлат думасига 2024 йил 19 июн куни Пхенянда имзоланган КХДР билан ҳар томонлама стратегик шериклик тўғрисидаги битимни ратификация қилиш ҳақидаги қонун лойиҳасини тақдим этди. Бу ҳақда 14 октябр куни «Интерфакс» агентлиги хабар берди. Ҳужжат Россия парламентининг онлайн маълумотлар базасида эълон қилинган.

Шартнома бандларининг бирида «агар томонлардан бири бирон-бир давлат ёки бир неча давлат томонидан қуролли ҳужумга учраса ва шу тариқа уруш ҳолатига тушиб қолса, иккинчи томон зудлик билан барча воситалар билан ҳарбий ва бошқа ёрдам кўрсатади», дейилади. 

Бошқа бир бандга кўра, бир давлатга қарши «қуролли тажовузкорлик акти таҳдиди юзага келган тақдирда» иккинчиси сўровига кўра дарҳол «ўз позицияларини мувофиқлаштириш ва бир-бирига ёрдам бериши мумкин бўлган амалий чораларни келишиш» учун икки томонлама каналлардан фойдаланиши керак».

Бундан ташқари, томонларнинг ҳар бири учинчи давлатлар билан бошқа мамлакатлар суверенитети, хавфсизлиги, ҳудудий яхлитлигига қарши қаратилган келишувлар тузмаслиги, сиёсий, ижтимоий, иқтисодий ва маданий тизимларни ривожлантириш ҳуқуқига эга экани ҳамда бошқа асосий манфаатларига қарши қаратилган битимлар тузмаслик мажбуриятини олиши айтилган.