Қўшимча функционаллар
-
Тунги кўриниш
Собиқ модел Стейси Уилямс Трампни тегажоғликда айблади
Президентликка номзод вакилларининг айтишича, бу «сохта айблов» Ҳарриснинг штаб-квартирасида ўйлаб топилган.
Собиқ модел Стейси Уилямс АҚШ президентлигига номзод Доналд Трампни тегажоғлик қилганликда айблади. Унинг сўзларига кўра, бу 1993 йилда содир бўлган, деб ёзди The Guardian.
Уилямс 1990 йилларда модел сифатида ишлаган. 1993 йилда у дўсти Жеффри Эпштейн билан Трампнинг уйига борган. Уилямс сўзларига кўра, шу ерда Трамп унга тегажоғлик қилган. «У мени ўзимни жирканч ҳис қилишга мажбур этди ва мен бутунлай саросимага тушганимни эслайман», деди Уилямс.
Трамп сайловолди ташвиқоти вакили Каролин Левитт Уилямснинг айбловларини «ёлғон» деб атади.
«Барак Обаманинг собиқ тарғиботчиси томонидан айтилган ва сайловдан икки ҳафта олдин Ҳарриснинг сайловолди ташвиқоти томонидан эълон қилинган бу айбловлар сўзсиз ёлғондир. Кўриниб турибдики, бу сохталикни Ҳаррис кампанияси ўйлаб топган», деди у.
АҚШ собиқ президенти Доналд Трампни тегажоғлик қилганликда биринчи марта айбланаётгани йўқ. Хусусан, 2023 йил май ойида Манҳэттен федерал суди ҳакамлар ҳайъати Трампни журналист ва ёзувчи Жин Кэрроллга жинсий зўравонлик қилганликда айбдор деб топди. Ҳакамлар ҳайъати Трамп Кэрроллни зўрлаганига ишонмади, лекин унга қарши «жинсий ҳаракатлар» қилган деган қарорга келди. Трампнинг ўзи бу айбловларни рад этиб, Жин Кэрроллни танимаслигини айтди.
