Берлин Украинадаги урушни қўллаб-қувватлагани учун КХДРга санкциялар билан таҳдид қилди

Агар Шимолий Корея қўшинларининг Россияга ўтказилиши ҳақидаги маълумот тасдиқланса, Германия КХДРга нисбатан санкцияларни кучайтириш ҳуқуқини ўзида сақлаб қолади, деб хабар берди Германия ТИВ.

Фото: Россия Мудофаа вазирлиги / dpa

Германия ташқи ишлар вазирлиги КХДР аскарлари Украинага қарши урушда қатнашса, КХДРга қарши янги санкциялар жорий этиш имкониятини тан олди. «Агар КХДР аскарлари Россия Федерацияси томонида жангларда қатнашаётгани ҳақидаги маълумотлар тасдиқланса, биз икки томонлама муносабатларда кейинги қадамлар, жумладан, қўшимча санкциялар жорий этиш ҳуқуқини ўзида сақлаб қоламиз», — деди 30 октябр, чоршанба куни Германия Ташқи ишлар вазирлиги матбуот котиби Себастян Фишер DW нашри саволига жавобан.

Унга кўра, Берлиннинг позицияси аввалроқ Германия ташқи ишлар вазирлигига чақирилган Шимолий Кореянинг муваққат ишлар вакилига етказилган. «Биз уни Россиянинг Украинага қарши ноқонуний тажовузини қўллаб-қувватламасликка ва Россияга тегишли ёрдамни тўхтатишга қатъий чақирдик», деди Фишер.

Берлиндаги матбуот анжуманида Германия ташқи ишлар вазирлиги вакили, шунингдек, Германия Хитой билан Шимолий Корея аскарларини Россияга ўтказиш бўйича НАТО ва АҚШнинг хулосаларини муҳокама қилганини айтди.

Киев ва Сеул КХДРга қарши туриш учун алоқаларни фаоллаштирмоқда

Украина президенти Володимир Зеленский жанубий кореялик ҳамкасби Юн Сок Ёл билан Киев ва Сеулнинг Россия томонида Украинадаги урушда Шимолий Корея қўшинларининг иштирок этиши кутилаётгани фонида телефон орқали мулоқот қилди. «Биз Шимолий Корея ҳарбийларининг Россиянинг Украинага бостириб киришига алоқадорлигини муҳокама қилдик, фақат битта хулоса бор – бу уруш халқаро тус олмоқда ва икки давлат чегарасидан ташқарига чиқмоқда», — деб ёзган Зеленский 29 октябр куни Telegramʼда.

Украина раҳбарининг сўзларига кўра, у Жанубий Корея президентига «3 минг Шимолий Корея ҳарбийларини жанговар зонага яқин ҳудуддаги Россия полигонларига ўтказиш ва уларнинг сонининг тахминан 12 мингга кўпайиши кутилаётгани ҳақида янги маълумотларни тақдим этган».

«Биз разведка маълумотлари ва тажриба алмашишни кучайтириш, кескинлашувга жавобан ҳаракатлар стратегияси ва қарши чоралар рўйхатини ишлаб чиқиш, шунингдек, умумий ҳамкорларни жалб қилиш учун барча даражаларда, жумладан, энг юқори даражадаги алоқаларни фаоллаштиришга келишиб олдик», деди у. Зеленский ушбу келишувлар доирасида Киев ва Сеул яқин орада ҳаракатларни мувофиқлаштириш учун делегациялар алмашишини қўшимча қилди.