АҚШ Ямандаги ҳусийчиларнинг қурол омборларига зарба берди

Қўшма Штатлар 9 ноябр куни кечқурун Ямандаги гуруҳ - ҳусийчиларнинг қурол-яроғ омборларига қарши бир неча ҳаво ҳужумини амалга оширди. Бу ҳақда 10 ноябр, якшанба куни Пентагонга таяниб, AFP хабар берди.

Унга кўра, омборларда Қизил денгиз ва Адан кўрфазининг халқаро сувларида кемаларни йўқ қилиш учун фойдаланилган қуроллар сақланган.

Ҳусийчиларнинг Al Masirah телевизион тармоғи АҚШ ва Британия ҳаво ҳужумлари Санодаги Эс Сабин ҳудудига амалга оширилгани ҳақида хабар берди. ОАВ хабарларига кўра, Яман пойтахтидаги Наҳдайн ва Ал-Ҳафа ҳудудлари ҳам ҳужумга учраган.

Ҳусийчилар Қизил денгиздаги зарбаларда Исроил билан алоқадор кемалар нишонга олинганини даъво қилди. Гуруҳ Эрон билан яқин алоқада бўлиб, Ливандаги «Ҳизбуллоҳ» ҳаракати билан ҳамкорлик қилади.

WSJ: РФ Россия сунъий йўлдошлари маълумотларини Яман ҳусийчиларига узатган

The Wall Street Journal (WSJ) 24 октябр куни хабар беришича, Россия Ямандаги ҳусийчиларга Қизил денгиздаги савдо кемаларига учувчисиз учоқлар ва ракета ҳужумлари учун РФ сунъий йўлдошларидан олинган маълумотларни тақдим этган.

Нашр суҳбатдошларидан бирининг сўзларига кўра, Россия сунъий йўлдоши маълумотлари Эрон Ислом инқилоби муҳофизлари корпуси ходимлари орқали юборилган. Россия томонидан тақдим этилган нишон белгиланиши ҳусийчиларга «зарбалар кўламини кенгайтиришга» имкон берди, деди у.

Нашр таъкидлаганидек, Россиянинг ҳусийчиларга берган бу ёрдами Россия раҳбарияти АҚШ назоратидаги Ғарбнинг иқтисодий ва сиёсий тартибини бузиш учун қанчалик узоққа боришга тайёрлигини кўрсатди.

Ҳусийчиларнинг Қизил денгиздаги ҳужумлари

WSJ билан суҳбатлашган манбаларга кўра, Россия, шунингдек, Қўшма Штатлар учун муаммо яратиш учун Яқин Шарқдан Осиёгача беқарорлик юзага келтиришга ҳаракат қилмоқда.

Ҳусийчилар Исроил Ғазо секторида Ҳамас ҳаракати билан уруш бошлаганидан сўнг Қизил денгиздаги тижорат кемаларига ракеталар ва учувчисиз учоқлар билан ҳужум қила бошлади. WSJ ҳисоб-китобларига кўра, 2023 йилнинг ноябридан 2024 йилнинг октябригача гуруҳ 100 дан ортиқ кемага ҳужум қилиб, иккитасини чўктириб, биттасини қўлга олган. Ҳужумлар глобал савдода катта бузилишларга олиб келди, чунки юк ташиш компаниялари ва ташувчилар муқобил йўлларни излашга мажбур бўлди.