Яқин Шарқдаги сўнгги воқеалар: Исроил ҳарбий-денгиз концернига зарба берди, ҳусийчилар яна ракета учирди

Шанба куни кечқурун CNN телеканали ва Times of Israel газетаси ҳусийчилар Исроил бўйлаб иккинчи ракетани учиргани ва уриб туширилгани ҳақида хабар берди.

Нашрларга кўра, бу сафаргиси қанотли ракета бўлган. Ҳусийчилар шанбага ўтар кечаси баллистик ракета ҳам учирганди.

Бундан ташқари, ҳусийчилар Исроил бўйлаб дронлар ҳам учирмоқда: Times of Israel ва Channel 12 телеканали ҳаво ҳужумидан мудофаа кучлари Қизил денгиздаги Эйлат портида ва курортда Ямандан учирилган дронлар ҳужумини қайтаргани тўғрисида хабар берган.

Шанба куни эрталаб ҳусийчилар вакили гуруҳ Исроил бўйлаб баллистик ракеталар гуруҳини учиргани ва «муҳим ҳарбий объектлар аниқ нишонга олингани», Исроилга қарши амалиёт «тажовуз якунланмагунича бутун қаршилик фронти бўйлаб» давом этишини маълум қилди.

Денгиз концерни бўйлаб зарба

Шанба куни Теҳронда яна кучли портлашлар рўй берди.

Исроил мудофаа кучлари бошқа нишонлар қатори Эрон денгиз саноати ташкилоти штаб-квартирасига ҳам зарба бергани ҳаққида хабар қилди. Эълон қилинган пресс-релизда айтилишича, бу концерн (инглизчасига Marine Industries Organisation) денгиз қуролларининг кенг ассортиментини, шу жумладан сувусти ва сувости кемаларини ҳамда денгиз дронларини ишлаб чиқаради.

Бу концерн Евроиттифоқ, АҚШ, Британия ва бошқа мамлакатлар томонидан санкцияга учраган. У Эроннинг турли қисмларида ўз заводларига эга.

Жаҳон агентликлари хабарига кўра, Исроил армияси пресс-атташеси Исроил Эрон ҳарбий саноатига зарбалар бериш частотасини ошираётгани ва "«бир неча кун ичида унинг барча муҳим таркибий қисмларига зарбаларни якунлаш»ни режалаштираётганини айтди.

Эроннинг баёнотлари

Эрондаги давлат нашрлари шанба куни АҚШнинг минтақадаги ҳарбий нишонларига муваффақиятли зарбалар берилгани ҳақида эълон қилишда давом этди, америкаликлар эса бу хабарлар ёлғон эканини таъкидлашда давом этмоқда.

Эрон бош штабининг «Дефа-пресс» нашри бош штаб пресс-атташеси, полковник Иброҳим Зулфиқорийга таяниб, Эрон Дубайдаги икки нуқтага зарба бериш орқали америкаликларга «жуда оғир йўқотишлар» етказиб, 500 га яқин кишини ўлдиргани ҳақида хабар берган.

Америка Марказий қўмондонлиги бунга X ижтимоий тармоғи орқали жавоб қайтарган: «Дубайда АҚШ шахсий таркибига зарбалар бўлгани йўқ. Эрон режими уларнинг ҳарбий салоҳияти йўқ қилингани ва бостирилгани ҳақидаги рад этиб бўлмайдиган ҳақиқатни яшириш учун ижтимоий тармоқларда ёлғон тўқимоқда».

Ислом инқилоби муҳофизлари корпуси шанба куни Fars News агентлиги орқали ўз ҳаво ҳужумидан мудофаа кучлари мамлакат жанубидаги Форс вилояти ҳудудида Американинг F-16 русумли қирувчи самолётига зарба бергани, у Саудия Арабисонига қўнмоқчи бўлганида қулаб тушгани, шунингдек, Шероз устида америкаликларнинг MQ-9 русумли дронини уриб туширгани ҳақида хабар тарқатди.

АҚШ Марказий қўмондонлиги бу хабар юзасидан ҳозирча муносабат билдирмади.

Ливанда «Ҳизбуллоҳ»га алоқадор журналистлар ўлдирилди

Шанба куни Ливан жанубида Исроилнинг автомобилга берган зарбаси оқибатида «Ҳизбуллоҳ» гуруҳига алоқадор телеканалларнинг уч нафар ходими ҳалок бўлди.

«Ал-Манар» телеканали ўз мухбири Али Шаиб Исроил зарбаси қурбони бўлгани ҳақида хабар берган. «Ал-Маядин» телеканали ҳам ўз мухбири Фотима Фтуний ҳам шу ҳодиса оқибатида ҳалок бўлгани ҳақида хабар тарқатди. Бундан ташқари, Ливан ахборот вазири маълум қилишича, машинада Фотима Фтунининг укаси ва оператори ҳисобланган Муҳаммад Фтуни ҳам бўлган.

«Ал-Манар» «Ҳизбуллоҳ» гуруҳи томонидан назорат қилинади, «Ал-Маядин» Эрон ва унинг минтақадаги иттифоқчиларини қўллаб-қувватловчи канал ҳисобланади.

Исроил армияси Али Шаибни «Ҳизбуллоҳ» разведкаси ходими ва Ливан жанубидаги Исроил ҳарбийларининг позицияларини аниқлаш билан шуғулланган террорчи деб ҳисоблагани учун «йўқ қилгани» ҳақида хабар берди. Бундан ташқари, исроилликлар уни ўзларига нисбатан нафрат қўзғатишда айблаган. Исроил армияси ўз баёнотида Шаибнинг «Ҳизбуллоҳ» разведкасига алоқадорлигига исбот келтирмаган.

«Ал-Манар» телеканали Шаибнинг ўлими ҳақидаги баёнотида уни «қаршилик журналистикаси афсонаси» деб атаган.

Али Шаиб 2010 йилда ҳам Ливан жанубида ишлаётганида оғир яраланганди.

Ливан президенти Жозеф Аун Х тармоғи орқали ҳалок бўлганлар «ўз касбий бурчини бажараётган фуқаролар» бўлганини маълум қилди.

«Бу сурбетларча жиноят бутун дунё бўйлаб урушда журналистларни ҳимоя қиладиган барча шартномалар ва нормаларни бузади», – деди Ливан президенти.

Чоршанба куни Ливанда Исроил авиазарбаси оқибатида «Ал-Манар»нинг штатдан ташқари ходими Ҳусайн Ҳамуд ҳалок бўлганди.

АҚШда жойлашган Журналистларни ҳимоя қилиш қўмитаси (CPJ) маълумотларига кўра, Исроил ва АҚШнинг Эрон билан уруши бошланганидан бери минтақада ҳаво ҳужумлари оқибатида яна камида уч нафар журналист ҳалок бўлган.

Бундан ташқари, Исроил мухолифлари уни Ливанда қутқарувчилар, шифокорлар ва парамедикларга ҳам зарба беришда айбламоқда.

BBC’нинг минтақадаги мухбири Ҳюго Бачеганинг хабар беришича, шанба куни Ливан жанубидаги Завтар шаҳрида исроилликлар зарбаси оқибатида беш нафар тиббиёт ходими ҳалок бўлган.

Ливан соғлиқни сақлаш вазири Ракан Насриддин Исроил ва «Ҳизбуллоҳ» ўртасида урушнинг янги босқичи бошланган 2 март кунидан буён Ливанда 51 нафар қутқарувчи ва парамедиклар ҳалок бўлганини маълум қилди – шундан тўққиз ўлим ҳолати шанба кунига тўғри келади.

Вазирнинг аниқлик киритишича, бу тўққиз кишидан тўрт нафари «Ҳизбуллоҳ» қошидаги ислом соғлиқни сақлаш қўмитаси ходимлари бўлган, қолган беш киши эса «Ҳизбуллоҳ»га иттифоқичси бўлган «Амал» ёшлар ҳаракати аъзолари эди.

Ливан бўйича экспертлар қайд этишича, доктор Ракан Насриддининг ўзи ҳам «Ҳизбуллоҳ» аъзоси ҳисобланади: у ўтган йил бошида шиаларнинг «Ҳизбуллоҳ» ва «Амал» партиялари Ливан ҳукуматини тузиш чоғида унинг таркибига киритилган беш вазирдан бири эди.