Нидерландия 9 декабрдан чегара назоратини жорий этади

Нидерландия ҳукумати 9 декабрдан бошлаб қироллик чегарасида олти ой амалда бўладиган назоратни жорий этмоқда. Бу ҳақда мамлакат миграция ва бошпана тақдим этиш масалалари вазири Маролейн Фабер маълум қилди.

Вазирнинг таъкидлашича, бу «вақтинчалик ва истисно чора» бўлиб, иқтисодий ўсиш ҳамда чегара ҳудудларидаги ҳаракатга имкон қадар камроқ тўсқинлик қилиши керак.

De Telegraaf нашрининг ёзишича, янги чора-тадбирлар ноқонуний миграцияга қарши курашишга қаратилган. Фабер янги қарор қабул қилингани тўғрисида Еврокомиссия, Европа Иттифоқи кенгаши, Европарламент ва Евроиттифоқ давлатларини хабардор қилган.

Чегарадаги назорат билан Нидерландия қироллик ҳарбий полицияси шуғулланади. Текширувлар қаерда ташкил этиши ва нечта назорат пункти ўрнатилиши ҳозирча номаълум. Вазирнинг сўзларига кўра, ҳукумат кейинчалик «текширувлар сонини кўпайтириш» ниятида.

Фабернинг тушунтиришича, қўшимча назорат фақат 9 декабрдан жорий этилиши мумкин, чунки қонунчиликка кўра янги қарор қабул қилинганидан кейин унинг ижросини бошлаш учун камида тўрт ҳафта ўтиши керак.

Аввалроқ ЕИ комиссари Юханссон Германия, Франция ва Нидерландия Шенген ҳудуди чегараларида маълумотларни автоматик йиғиш тизимини жорий этишга тайёр эмаслигини маълум қилганди. Тизим 10 ноябрдан кучга кириши керак эди.