Тошкентда дорилар савдоси билан шуғулланиб келган шахслар ушланди

Тошкентда сифатни тасдиқловчи ҳужжатлари бўлмаган 199 млн сўмлик дорини сотмоқчи бўлганлар ушланди.

Фото: Прокуратура департаменти

Тошкент шаҳрида дори воситалари ноқонуний савдоси билан шуғулланиб келган шахслар ушланди.

Бош прокуратура ҳузуридаги Иқтисодий жиноятларга қарши курашиш департаменти хабарига кўра, Юнусобод туманида фуқаро Н.К. ва бошқалар тегишли сифатни тасдиқловчи ҳужжатлари бўлмаган умумий баҳоси 199 млн сўмлик хорижда ишлаб чиқарилган 10 минг қути “Левомер 500 мг” номли дори воситасини фуқаро М.Х.га 13 минг долларга сотган вақтида ушланди.

Мазкур ҳолат юзасидан Жиноят кодексининг 186-3-моддаси (сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш) билан жиноят иши қўзғатилиб, тергов ҳаракатлари ўтказилмоқда.