Руминияда президентлик сайловларида ўнг номзод етакчилик қилмоқда

Руминияда президентлик сайловларининг биринчи босқичида ўнг номзод Кэлин Жоржеску етакчилик қилмоқда. Иккинчи ўринда - мамлакат бош вазири ва социал-демократ Марчел Чолаку.

Фото: oradesibiu.ro

25 ноябр, душанбага ўтар кечаси мамлакат Марказий сайлов комиссияси маълум қилишича, ўнг сиёсатчи Кэлин Жоржеску Руминиядаги президентлик сайловларининг биринчи босқичида 22,18 фоиз билан етакчилик қилмоқда.

Иккинчи ўринда 20,3 фоиз овоз билан социал-демократ ва Руминия бош вазири Марчел Чолаку турибди, у экзитполлар натижаларига кўра ғалаба қозониши башорат қилинган эди. Учинчи натижани «Руминияни қутқариш иттифоқи» либерал партиясидан Елена Ласкони кўрсатмоқда (17,94 фоиз). Кучли тўртликни ўта ўнг номзод Жорже Симион 14,18 фоиз овоз билан якунлади.

Тахминан 19 миллион киши истиқомат қилувчи Руминиядаги сайлов участкалари маҳаллий вақт билан соат 21.00 (Тошкент вақти билан 23.00)гача очиқ эди. Таҳлилчиларнинг фикрича, мамлакатда кучли сиёсий кескинлик ҳукм сурмоқда, норозилик 2023 йилда 10 фоизга етган ва 5,5 фоиз даражасида қолаётган рекорд даражадаги инфляция туфайли юзага келган.

Руминияда давлат раҳбари ташқи ва хавфсизлик сиёсатини белгилайди, қуролли кучлар олий қўмондони ҳисобланади ва разведка хизматларини назорат қилиш билан шуғулланади. Руминияда парламент сайловлари 1 декабрга белгиланган.

Сайловда жами 13 нафар номзод иштирок этди. Иккинчи тур 8 декабрга белгиланган.

#Руминия #сайлов