Хитой иккита сунъий йўлдошини муваффақиятли учирди

Хитой Ерни масофадан зондлашга мўлжалланган «Гаоцзин» сериясига кирувчи бир жуфт сунъий йўлдошини орбитага муваффақиятли учирди, деб хабар беради «Синхуа» агентлиги.

Қайд этилишича, ҳар иккала сунъий йўлдош мамлакат шимоли-ғарбидаги Цзюцюан космодромидан «Чанчжен-2C» ташувчи ракетаси ёрдамида учирилган. Стартдан кейин сунъий йўлдошлар белгиланган орбитага муваффақиятли етиб борган.

«Гаоцзин» сериясига кирувчи сунъий йўлдошлар Siwei Surveying and Mapping Technology Co компанияси томонидан яратилган бўлиб, улар фуқаролик ва тижорий мақсадлар учун юқори сифатли оптик сунъий йўлдош тасвирларини тақдим этишга мўлжалланган.

«Гаоцзин» сунъий йўлдошларининг дастлабки гуруҳи 2016 ва 2018 йилларда, учинчи гуруҳи эса жорий йилнинг 15 апрелида учирилган эди.

Хитой қуёш-синхрон орбитасида ишлайдиган «Гаоцзин» сериясига кирувчи жами 28 та сунъий йўлдошдан иборат гуруҳни яратишни режалаштирган.

Аввалроқ Хитой 15 та сунъий йўлдош ортилган тижорий ракетани учирганди. Орбитага «Цзилин-1 Гаофэн», «Юняо-1», «Сигуан-1» серияларидаги аппаратлар, шунингдек, Ўмон учун мўлжалланган масофадан зондлаш сунъий йўлдоши олиб чиқилган.