Шаҳзода Эндрюнинг ишончли вакили Хитой фойдасига жосусликда гумонланмоқда

Буюк Британия қироли Чарлз III нинг укаси шаҳзода Эндрюнинг ишончли одами Хитой фойдасига жосусликда гумон қилиниб, мамлакатга кириши тақиқланди. 2023 йилда қабул қилинган ушбу қарор 13 декабр, жума куни Лондон суди томонидан тасдиқланган.

Суд қарорида айтилишича, Эндрю номи ошкор этилмаган Хитой фуқароси билан шунчалик яқин муносабатда бўлганки, уни туғилган кунига таклиф қилган. Британия расмийларининг фикрича, жосусликда гумон қилинаётган шахс Хитой Коммунистик партиясининг хорижий ташкилотларга таъсир ўтказган бўлими бўлган Ягона фронт бўлинмаси (АҚШ томонидан 2020 йилда «хорижий миссия» сифатида таснифланган) номидан ишлаган бўлиши мумкин. Хусусан, Эндрю билан алоқадор бўлган исми ошкор этилмаган тадбиркор «Хитойнинг юқори мартабали амалдорлари ва Британиянинг таниқли арбоблари ўртасида Хитой давлати томонидан сиёсий аралашув мақсадида фойдаланиши мумкин бўлган муносабатларни ривожлантириш қобилиятига эга эди», дейилади суд қарорида.

Шаҳзода Эндрю, ўз навбатида, гумон қилинаётган Хитой фуқаросига нисбатан шубҳалар пайдо бўлиши биланоқ у билан барча алоқаларни тўхтатганини айтди. Унинг идораси баёнотида, шунингдек, у билан «расмий каналлар орқали» учрашгани ва «нозик нарсаларни» муҳокама қилмагани билдирилди.

Шаҳзода Эндрюнинг Хитой фойдасига жосусликда гумон қилинган ишончли одами ҳақида нималар маълум?

Лондон Пекин фойдасига жосусликда гумон қилаётган Хитой фуқароси 50 ёшда. У 2002 йилда талаба сифатида Буюк Британияга кўчиб ўтган ва Британия компанияларига Хитойдаги фаолияти бўйича маслаҳат берувчи бизнесни йўлга қўйишдан олдин Йорк университетида магистратурани тамомлаган. 2013 йилда у мамлакатда чексиз муддатга яшаш ва ишлаш ҳуқуқини олди ва Буюк Британияни ўзининг иккинчи ватани деб атаган.

2021 йил 6 ноябрда у мамлакатга кираётганда тўхтатилди ва унинг телефони ва бошқа қурилмалари кўздан кечирилди, уларда Эндрюнинг катта маслаҳатчисининг шаҳзода номидан ҳаракат қилиш ваколатига эга эканлигини тасдиқловчи хати топилди.