Россия Қозоғистондаги уран қўшма корхоналаридаги улушини Хитойга сотади

Қозоғистоннинг «Казатомпром» компанияси ўзининг россиялик ҳамкори уран қазиб олиш билан шуғулланувчи қатор қўшма корхоналардан чиқишини эълон қилди.

Фото: Казатомпром

Россиянинг «Росатом» давлат корпорациясининг шуъба корхонаси Uranium One Group Қозоғистон миллий ядровий компанияси «Казатомпром» билан тузилган қатор қўшма корхоналардан чиқди. Бу ҳақда 17 декабр, сешанба куни чоп этилган «Казатомпром»нинг пресс-релизида айтилади.

«Казатомпром» миллий атом компанияси» АЖ россиялик шериги бир қатор қўшма корхоналардан чиқаётганини эълон қилади. «Росатом» давлат корпорацияси таркибига кирувчи Uranium One Group АЖ «Заречное» АЖ ҚКдаги 49,979 фоиз улушини SNURDC Astana Mining Company Limited компаниясига сотди, унинг якуний бенефициари - State Nuclear Uranium Resources Development Co. (Хитой). «Казатомпром»нинг ушбу қўшма корхонадаги улуши ўзгаришсиз қолмоқда ва 49,979 фоизни ташкил этади», — дейилади ҳужжатда.

Аниқлик киритилишича, 2024 йил бошида «Заречное» конидаги уран захиралари 3,5 тоннага баҳоланган, қазиб олишни 2028 йилга якунлаш режалаштирилган.

Uranium One Group АЖ «Хорасан-U» қўшма корхонасидаги ўзининг 30 фоиз улушини ва «Кызылкум» МЧЖ устав капиталидаги 30 фоиз улушини China Uranium Development Company Ltd компаниясига сотиши кутилмоқда. «Казатомпром»нинг ушбу активлардаги улуши ўзгармади, компания «Хорасан-U» МЧЖ ҚКда 50 фоиз ва «Кызылкум» МЧЖда 50 фоиз (билвосита) улушга эгалик қилади, дейилади пресс-релизда.

«Хорасан-U» МЧЖ ҚК Қизилўрда вилоятининг Жанақўрғон туманидаги Шимолий Хуросон конининг «Хорасон-1» участкасида ишламоқда. Ҳужжатда айтилишича, кондаги уран захиралари 2024 йил бошида 33 минг тоннага яқинни ташкил этади, қазиб олиш ишлари 2038 йилда якунланиши кутилмоқда.

«Кызылкум» МЧЖ ер қаъридан фойдаланиш ҳуқуқига эга эмас ва уранни қайта ишлаш бўйича хизматлар кўрсатиш билан шуғулланади, дея таъкидлайди «Казатомпром».

Қозоғистонда уран қазиб олиш

The Moscow Times интернет нашрига кўра, Uranium One Group компанияси 2023 йилда Қозоғистонда 4800 тонна уран қазиб олган, бу Россияда 2700 тонна қазиб олиш билан бирга «Росатом»ни бозордаги 14 фоизлик улуш билан дунёда учинчи ўринга олиб чиққан.

Нашрда, шунингдек, 75 фоизи Қозоғистоннинг «Самрук-Казына» давлат жамғармасига тегишли бўлган «Казатомпром» Қозоғистонда мустақил равишда ҳам, қўшма корхоналар орқали ҳам уран қазиб олиши айтилади. «Компания дунёдаги уран қазиб олишнинг 20 фоизини таъминлайди ва уни Хитой, Жанубий ва Шарқий Осиё, Шимолий Америка ва Европага экспорт қилиш учун сотади».

#Қозоғистон #уран