Жанубий Корея президенти ҳибсга олинди. Иккинчи уринишда

Жанубий Кореяда ҳарбий ҳолат эълон қилиб, бир муддат мамлакатда хаос юзага келтирган президент Юн Сок Йол эсингизда бўлса керак. Биз унинг шармандали ҳаракатлари ҳақида видео тайёрлаб, унда жаноб Йол катта эҳтимол билан қамалишини айтгандик. 14 январ куни Корея полицияси иккинчи уринишда эндиликда собиқ президентни ҳибсга олди. Уни қўлга олиш жараёни Aлмазбек Aтамбаевни қўлга олиш жараёнини эслатиб юборди. Фақат бу ҳолат жиддийроқ, жаноб Йол тунов кунигача Корея президенти эди.

Иккинчи уринишда

Корея полицияси президент Йолни ҳибсга олиш учун бир неча кун аввал ҳам ҳаракат қилганди. Aммо ўшанда президент қўриқчиларга жиддий қаршилик қилгани сабаб полиция қон тўкилишига йўл қўймаслик учун операцияни қолдиради. Бу гал эса полиция катта куч билан президент қароргоҳини штурм қилди. Корея тарихидаги энг йирик полиция операциясида 3 минг нафар зобит қатнашди.

Президент қўриқчилари бир неча соат давомида қаршилик қила олди холос. Охир-оқибат полиция президентни қўлга олиб, Коррупцияни тергов қилиш бюросига олиб боришни уддалайди. Полиция штурмни 14 январ тонг саҳар 4:20 да бошлайди. Кун ярмига бориб операция муваффақиятли якунланади. Бу Кореяда амалдаги президентни ҳибсга олиш билан боғлиқ илк ҳолат бўлди.

Президент Йол уни қўлга олишларини қонун устуворлигининг тугаши деб атади. Шунингдек, қон тўкилмаслиги учун сўроққа боришга рози бўлганини айтди. Энди президент Юн Сок Йол тергов беради. Ҳеч қандай асоссиз Кореяда ҳарбий ҳолат қилган президентнинг сўзларига кўра, унга қарши олиб борилаётган тергов ҳаракатлари ҳам ноқонуний. Илон Маск бу ҳолатга «Қизалоқ, энди сенинг гапинг ўтмайди», деб муносабат билдирган бўларди. Корея мухолифати президент Юн Сок Йолнинг қўлга олиниши демократия устуворлигини таъминлаш йўлидаги бир қадам эканини маълум қилди.

Президент нимада айбланмоқда?

Собиқ президент Юн Сок Йол қўзғолонга бошчилик қилиш, мансаб ваколатини суиистеъмол қилишда айбланмоқда. Aввалроқ уни давлатга хиёнатга ҳам айблашаётгани айтилганди. Лекин юқоридаги икки айб президент учун давлатга хиёнат айбловидан кам эмас. Собиқ президент иш бўйича гумонланувчи сифатида уч марта тергов беришга бормагани учун Сеул Ғарбий округ суди 31-декабрда уни ҳибсга олишга ордер берган. 3 январ куни полиция биринчи уринишда президент Юнни ҳибсга ололмайди.

Эсингизда бўлса, президент Юн Сок Йол 3 декабр куни Кореяда ҳарбий ҳолат эълон қилган ва Сеул кўчаларида танклар юра бошлаганди. Президент бундай қарорга гўёки парламентда Шимолий Кореяни қўлловчи кучлар пайдо бўлганини сабаб қилиб кўрсатганди. Лекин бу гапига ҳеч қандай асос келтирмайди. Президент ҳарбий ҳолат эълон қилганига бутун мамлакат, ҳатто унинг партияси ҳам қарши чиқади. Корея парламенти аъзолари парламент биносига киришда қаршиликка учраган бўлса-да, бир амаллаб тунда йиғилиш ўтказиб, ҳарбий ҳолатни бекор қилади.

Бу иш фонида президент Юн Сок Йол 13 декабр куни ҳокимиятдан четлатилади. 27 декабр куни бош вазир Хан Дол Су вақтинча президент вазифасини бажарувчи бўлди. Лекин кейинроқ парламент уни ҳам лавозимдан озод қилди. Ҳозирда молия вазири Чхве Сан Мок вақтинча президент вазифасини бажармоқда.

Ўткир Жалолхонов тайёрлади.

Тасвирчи ва монтаж устаси – Жаҳонгир Алибоев.