16 январ куни Kurbanoff.net канали муаллифи янги телефон IMEI кодини рўйхатдан ўтказишда аввалгидек хорижга боришнинг ўзи етарли эмаслиги, энди мобил қурилмани Ўзбекистонга олиб кираётганда декларация тўлдириш кераклиги ҳақида ёзди. Шундан сўнг Телекоммуникация тармоқларини бошқариш маркази ДУК ва Божхона қўмитаси ҳолатга изоҳ берди.
Маълум қилинишича, бу тартиб бир неча ой олдин ишга тушган.
Эндиликда Ўзбекистонга янги мобил қурилмани олиб киришда божхона декларациясини тўлдириш керак. Акс ҳолда UzIMEI тизимида қурилмани рўйхатдан ўтказишда бож тўлашга тўғри келади. Янги талаб қонунчиликка 2024 йил бошида киритилган бўлиб, Божхона қўмитаси ва UzIMEI тизими ўртасидаги интеграция 2024 йилнинг октябрида якунланган.
Соддароқ қилиб тушунтирамиз.
Масалан, сизда қайсидир русумдаги (Samsung, Xiaomi ёки iPhone), хорижда ишлаб чиқарилган мобил телефон бор ва уни UzIMEIʼдан рўйхатдан ўтказмоқчисиз. Рўйхатдан ўтказиш учун uzimei.uz сайтида қурилманинг IMEIʼсини ёзсангиз, тизим уни божхона базасидан қидиради. Агар маълумот бўлмаса, мобил қурилма божхона қийматининг 30 фоизи миқдорида бож тўлаш керак. Чунки бу телефонлар Ўзбекистонда ишлаб чиқарилмаган, шу сабаб чет элдан олиб кирилган ҳисобланади.
2023 йилда юмшатилган қонунчилик бўйича жисмоний шахслар 2024 йил 28 январдан бошлаб ҳар сафар чегарадан кириб келишда иккитадан мобил қурилмани олиб кириши мумкин. Аэропорт орқали олиб кирилганда бир ёки иккита телефоннинг умумий миқдори 2000 доллардан, поезд орқали кириб келишда 1000 доллардан, автомобил ёки пиёда кириб келишда 300 доллардан ошмаслиги керак. Агар аэропорт орқали кирганда сумма шартли равишда 2300 долларни ташкил этса, икки мингдан ошган қисмига, яъни 300 долларга 30 фоиз бож тўланади. Халқаро курерлик жўнатмалари орқали эса ҳар бир жисмоний шахс учун хориждан товарларни божсиз олиб кириш чегараси – бир календар чорак учун 1000 долларни ташкил этади.
Шу тариқа, янги мобил қурилмаларни олиб кирганда мажбурий декларация қилиш лозим. Декларация қилиш, яъни янги телефон олиб кираётганингизни билдириб қўйиш уни солиқлардан озод қилади (2 тагача бўлса). Агар битта янги телефон олиб кирсангиз ҳам, лекин уни декларация қилмасангиз, UzIMEI’дан ўтказишда сиздан қурилма божхона қийматининг 30 фоизи миқдорида бож тўлаш сўралади.
