«Jinoiy guruhda oddiy farroshdan tortib, mansabdor shaxsgacha bor». IIV mulozimi «IMEI ishi» bo‘yicha tafsilotlarni ochiqladi

IIV mulozimi Baxtiyor Sulaymonov fuqarolarning pasport ma'lumotlaridan noqonuniy ravishda foydalanib, ulardan mobil qurilmalarda IMEI kodlarini kiritishda foydalanganlik holati bo‘yicha ayrim tafsilotlarni ma'lum qildi. Bu haqda Gazeta.uz xabar bermoqda.

«Bu bo‘yicha rasman 7 mingga yaqin holatlar aniqlangan. Balki, bundan ham oshar, chunki tergov harakatlari davom ettirilmoqda. Fuqarolarning murojaat etgani va etmagani bor. Murojaat etganlarni biz ro‘yxatga olib, tergovga yo‘naltirganmiz», — deydi mulozim.

U shuningdek, uyushgan jinoiy guruh tarkibida turli kasb vakillari mavjudligiga ham to‘xtalib o‘tdi:

«Uyushgan jinoiy guruh tarkibida karantin zonada ishlagan oddiy farroshdan tortib, mansabdor shaxsgacha bor. Kim qaysi darajada jinoyat sodir qilgani hali ma'lum emas. Tergov davom etmoqda. Yangi holatlar aniqlanib, tergovga qo‘shib borilmoqda. 7 ming nafarning ichida fuqarolar o‘zi murojaat qilgani bor. Uyushgan jinoiy guruh tomonidan sodir etilgani, aniq raqamini bilmayman, lekin 5 ming nafardan o‘tgan. Respublika bo‘yicha karantin zonalarini hammasida kuzatilgan bu holat. Bitta Andijondamas, Toshkent viloyati va boshqa joyda ham kuzatilgan».

Rasmiylarga ko‘ra, bunday jinoyatlar faqatgina karantin zonalarda emas, balki bojxona chegara punktlarida ham sodir etilgani aniqlangan.

Davlat bojxona qo‘mitasi bosh inspektori Baxtiyor Kabirovga ko‘ra, xuddi shunday harakatlar Andijon viloyatidagi «Do‘stlik» chegara postida ham uyushgan guruh tomonidan amalga oshirilgan.

«Qo‘mita vakillari tomonidan Qirg‘iziston tomonga o‘tib, u yerdan pasportlarni olib, 5 dollardan 20 dollargacha bo‘lgan qiymatda sotib olib, har bitta chegaradan o‘tgan fuqaro nomiga mobil qurilmalarning IMEI-kodlarini ro‘yxatga olib, o‘tkazayotgani aniqlangan. Tegishli protsessual hujjatlar rasmiylashtirilgan. Bugungi kunda bu bo‘yicha tergov olib borilyapti», — deya ma'lum qildi B.Kabirov

Eslatib o‘tamiz, avvalroq ijtimoiy tarmoqlarda chet eldan kelgan fuqarolarning pasport ma'lumotlari o‘g‘irlanib, boshqa telefonlarga UzIMEI'dan ro‘yxatdan o‘tkazilayotgani bo‘yicha shikoyatlar ko‘paygani, Kun.uz’ga ham o‘nlab ana shunday mazmundagi murojaatlar kelib tushgani xabar qilingandi.

Davlat bojxona qo‘mitasi mobil qurilmalarni UzIMEI tizimida noqonuniy ro‘yxatdan o‘tkazish bilan shug‘ullanib kelgan jinoyatchilarni aniqlagani, holat yuzasidan Jinoyat kodeksining 141-2-moddasining 2-qismi «a» va «v» bandlari bilan jinoyat ishi qo‘zg‘atilib, tergov organiga yuborilgani ma'lum qilingandi.