Samsung 2025 йилда илк учбукламафонларни сотувга чиқаради

Компания бундай смартфонларни йилига 200 минг дона ишлаб чиқаришни режалаштирмоқда.

Фото: 9to5Google

Samsung компанияси биринчи учбукламафонларини (икки тарафдан букиладиган смартфон) 2025 йилнинг учинчи чорагида бозорга чиқариши кутилмоқда. Бу ҳақда манбалар ва Жанубий Кореянинг The Elec нашрига таяниб 9to5Google сайти хабар берди.

Ушбу қурилманинг экрани оддий буклама смартфонларга қараганда каттароқ бўлади, чунки унга иккинчи шарнир қўшилади. Экран тўлиқ очилган ҳолатда 9,9 дюймдан 10 дюймгача келади, бу Galaxy Z Fold 6ʼнинг 7,6 дюймли дисплейидан сезиларли даражада катта.

Қурилма 2025 йилнинг учинчи чорагида, Samsung’нинг бошқа йиғма дебютантлари — Galaxy Z Flip 7, Galaxy Z Fold 7 ва Galaxy Z Flip FE билан бир вақтда чиқарилиши кутилмоқда.

The Elec хабарига кўра, Samsung Electronics компаниясининг учбукламафони (Три Fold) йилига 200 минг дона ишлаб чиқаришга мўлжалланган. Бундан келиб чиқилса, компания қурилманинг фойдаланувчилар орасида оммалашишини кутмаяпти.

Tri Fold Samsung Display томонидан ишлаб чиқарилган ва 2022 йилдаги CES’да (Халқаро инновацион истеъмол технологиялари кўргазмаси) намойиш этилган Flex G’га ўхшаб кетади. Унинг экрани уч қисмга бўлинган бўлиб, чап ва ўнг дисплейларни марказга қараб букиш мумкин. Tri Fold учун қисмларини оммавий ишлаб чиқариш йилнинг иккинчи чорагида бошланади.

#Samsung #смартфон #технология

Kun.uz янгиликларини Google News'да кузатинг

+ Обуна бўлиш