Бош котиб Марк Рютте НАТОни Украинадаги уруш йўналишини ўзгартиришга чақирди

23 январ, пайшанба куни Давосда бўлиб ўтган Жаҳон иқтисодий форумида НАТО бош котиби Марк Рютте Россия президенти Владимир Путиннинг Украинадаги ғалабаси НАТОнинг ўз душманларини тўхтатиб туриш қобилиятига путур етказиши ва алянсдан уларга қарши курашиш учун кўпроқ маблағ сарфлашини талаб қилиши ҳақида гапирди. «Шунинг учун ҳам Доналд Трамп ҳақ: Европа мудофаа харажатларини зудлик билан ва сезиларли даражада ошириши керак», — дея қўшимча қилди у.

Украинани қўллаб-қувватлашни камайтирмаслик керак, аксинча ошириш керак, деб таъкидлади Рютте. «Биз уруш йўналишини ўзгартиришимиз керак. Ғарб XXI асрда бир давлатнинг бошқа давлатга бостириб кириб, уни мустамлака қилишга уринишига йўл қўя олмайди», — дейди у.

Агар Украина мағлуб бўлса, Рютте фикрича, НАТО «тўхтатувчи салоҳиятини тиклаш учун ҳозирда мудофаа харажатларини ошириш ва саноат ишлаб чиқаришини ривожлантиришга талаб қилинадиган нархдан анча юқори нарх тўлаши керак». «Бу миллиардлаб эмас, триллионлаб бўлади», деб огоҳлантирди НАТО бош котиби.

Мудофаа харажатларини ошириш

Марк Рютте фикрича, НАТО ҳозир хавфсиз, аммо 4-5 йилдан кейин алянс мудофаа харажатларини ЯИМнинг икки фоизигача чекласа, ўзини ҳимоя қила олмайди. «Бу алянс мамлакатлари олдига қўйилган мақсад бўлса-да, 2024 йилга келиб 32 тадан 23 тасигина бунга эриша олди. Лекин бу етарли эмас ва АҚШ президенти Доналд Трамп Европа иттифоқчиларидан мудофаа учун кўпроқ маблағ сарфлашни талаб қилишда мутлақо тўғри», деди Нидерландия собиқ бош вазири.

«Трамп АҚШнинг НАТОда ёмон келишувга эришганини ва Европа асосан ўзининг ижтимоий моделини, соғлиқни сақлаш тизимини ва пенсия тизимини молиялаштираётганини ҳис қилди, биз мудофаани етарли даражада молиялаштирмаяпмиз. Биз бу 2 фоизга етдик, муаммо шундаки, бу 2 фоиз мутлақо етарли эмас», деб таъкидлади Рютте.