Россияда никоҳ асосида яшаш учун рухсатнома олиш талаблари кучайтирилди

Энди вақтинчалик яшаш учун рухсатнома олиш учун хорижликлар Россия фуқароси билан камида уч йил никоҳда яшаши керак.

Фото: Ведомости

Россияда 25 январдан сохта никоҳларга қарши кураш тўғрисидаги қонун кучга кирди. Унга кўра, соддалаштирилган тартибда вақтинчалик яшаш учун рухсатнома (ВНЖ) олиш учун хорижликлар Россия фуқароси билан энди камида уч йил никоҳда яшаши керак. Агар никоҳ бузилган ёки судда ҳақиқий эмас деб топилган бўлса, вақтинчалик яшаш учун рухсатнома ҳам бекор қилинади.

Бундан ташқари, Россияда доимий яшовчи ва Россия фуқаролигига эга бўлган фарзанди бор, ота-онасидан бири Россия паспортига эга бўлган чет элликларга ВНЖ суд томонидан уларнинг биргаликда яшаётгани факти тасдиқланиши шарти билан берилади. Агар чет эл фуқароси ота-оналик ҳуқуқидан маҳрум бўлса ёки оталик бекор қилинса, яшаш учун рухсатнома ҳам бекор қилиниши мумкин.

2023 йилда вақтинчалик яшаш учун рухсатномалар бериш тўғрисидаги қарорларнинг умумий сонининг қарийб 40 фоизи Россия фуқароси билан никоҳда бўлганлиги сабабли қабул қилинган ва яшаш учун рухсатномаларнинг ярми Россия фуқаролиги бўлган болаларнинг мавжудлиги асосида берилган. Россия Ички ишлар вазирлиги аввалроқ кўплаб қарорлар сохта никоҳ ёки сохта оталикка асосланган бўлиши мумкинлигини маълум қилган.