Трамп 1 февралдан Мексика ва Канада товарларига бож жорий қилди

АҚШ президенти Доналд Трамп Канада ва Мексикадан импорт қилинадиган маҳсулотларга режалаштирилган 25 фоизлик бож ҳақидаги қарор 1 февралдан кучга киришини маълум қилди, деб хабар берди Euronews.

Трампнинг қарори, унинг сўзларига кўра, савдо ҳамкорлари таклиф қилаётган нархларнинг адолатлилигини баҳолашга асосланади. Дастлаб, АҚШ президенти тарифлар таҳдидини ноқонуний иммиграция ва фентанил ишлаб чиқариш учун ишлатиладиган кимёвий моддалар контрабандасига қарши кураш билан боғлаган эди.

Унинг таъкидлашича, божлар ушбу мамлакатлардан импорт қилинадиган нефтга тааллуқли экани ҳақида ҳали якуний қарорга келмаган.

Euronews таъкидлаганидек, бож тарифларининг жорий қилиниши бензин нархининг ошишига олиб келиши мумкин. Трамп бу масалани ўз президентлик кампаниясининг марказий қисмига айлантириб, бир йил ичида ёқилғи нархларини икки баравар пасайтиришга ваъда берган эди.

Нашр хабарига кўра, бизнес вакиллари божлар жорий этилиши оқибатларидан хавотир олмоқда. Канада Савдо палатасининг ижрочи вице-президенти Мэтю Ҳолмс режадаги чора-тадбирларни «мағлубият» деб атади ва улар ҳаётни қимматроқ қилишини, ҳар икки мамлакатдаги бизнесни қийин аҳволга солиб қўйишини таъкидлади.

Ўз навбатида, Канада бунга жавобан 105 миллиард доллар қийматидаги Америка товарларининг дастлабки рўйхатини тайёрлади, уларга нисбатан бож жорий қилинади.