Панама АҚШ давлат котиби ташрифидан кейин Хитой билан қўшма лойиҳадан чиқадиган бўлди

Панама Хитойнинг «Бир камар — бир йўл» лойиҳасидан чиқади. Ушбу лойиҳа доирасида икки мамлакат Панама каналидан савдо мақсадларида ҳамкорлик қилиши кўзда тутилган, деб ёзади Deutsche Welle.

«Мен муҳим қарор қабул қилдим ва бу ҳақда сизларга маълум қиламан. Ҳукуматим «Бир камар — бир йўл» ташаббуси бўйича 2017 йилги англашув меморандумини узайтирмайди. Биз лойиҳани муддатидан олдин якунлаш имкониятини ўрганиб чиқмоқдамиз», — дейди мамлакат президенти Хосе Раул Мулино.

Панама президентининг сўзларига кўра, АҚШ давлат котиби Марко Рубио Панама каналини АҚШ назоратига қайтариш ёки куч ишлатиш бўйича реал таҳдид ҳақида гапирмаган. Аммо у Америка президенти Доналд Трамп Хитойнинг минтақадаги иштироки Вашингтон Панама каналини назорат остига берган вақтда тузилган шартнома талабларини бузишини таъкидлаган. Қайд этилишича, Пекиннинг муҳим юк ташиш йўлига таъсири биринчи навбатда, Қўшма Штатлар томонидан қурилган каналнинг «доимий бетарафлик» мажбуриятларини бузади.

2 феврал куни Марко Рубио Хосе Раул Мулино билан учрашув давомида Хитойнинг Панама каналига таъсиридан норозилигини билдирган. АҚШ Давлат департаменти раҳбари «мавжуд вазиятни қабул қилиб бўлмаслигини ва зудлик билан ўзгартирилмаса, Қўшма Штатлар ўз ҳуқуқларини ҳимоя қилиш учун чора кўриши кераклигини» айтган.

Мулино шу куни Вашингтон билан бўлиб ўтган мулоқотни ижобий баҳолаган эди. Панама президенти канал мамлакат бошқаруви остида экани ва ушбу мақом ўзгаришсиз қолишини билдирган. Икки давлат портлардаги вазиятни яхшилаб ўрганиш учун техник гуруҳ тузишга келишиб олган.

АҚШ давлат котиби ва Панама президентининг музокаралари вақтида норозилик намойишлари бўлиб ўтди. Панама кўчаларига чиққан ўнлаб одамлар Вашингтоннинг муҳим савдо йўли ҳақидаги даъволарига қаршилик билдирган. Бунга Трампнинг Панама каналини ўз мамлакати назорати остига қайтариш ҳақидаги таҳдиди сабаб бўлган.