Икки кунга бормаган божлар: Трамп Канада ва Мексикага савдо тарифларини кечиктирди

Доналд Трамп Мексика ва Канададан импорт қилинаётган маҳсулотларга 25 фоиз, Хитойникига эса 10 фоизлик янги божлар киритиб, орадан 2 кун ҳам вақт ўтмай уларни тўхтатиб туришга қарор қилди. Шимолий Америкада жуда кўп турдаги товарлар нархи ошишига олиб келувчи бож сиёсатига 1 ойлик танаффус берилди. Лекин Хитой учун бу тарифлар амалда.

Трамп Канада бош вазири ва Мексика президенти билан телефон орқали мулоқот қиларкан, иккала давлат билан шунга келишганини маълум қилди. Эвазига ҳам Мексика, ҳам Канада АҚШ чегараларини яхшироқ қўриқлайди.

Канада бош вазири Жастин Трюдо йиғимлар ҳақида ёзаркан, у Х ижтимоий тармоғида «президент Трамп билан яхши суҳбатдан кейин» аввал жорий қилинган тарифлар «биргаликда ишлашда давом этар эканмиз, камида 30 кунга тўхтатилади» деб ёзди. 

Доналд Трамп эса «шанба куни эълон қилинган тарифлар Канада билан якуний иқтисодий келишув тузилиши мумкинлигини кўриш учун 30 кунга тўхтатилишини маълум қилди.

Ҳар икки раҳбар, шунингдек, Оттава икки давлат чегарасини ҳимоя қилиш ва трансчегаравий наркотик моддалар савдосига қарши курашни кучайтириш учун 1,3 миллиард доллар сармоя киритишини айтди. «Канада бизнинг шимолий чегарамиз хавфсизлигини таъминлашга рози бўлди», деб ёзади Трамп Truth Social’да.

Бундан ташқари Трамп Мексика президенти Клаудия Шейнбаум билан ҳам 3 феврал куни телефон орқали гаплашган. Мулоқот дўстона ўтгани айтилади, АҚШ Мексикага ҳам белгилаган тарифларини 1 ойга тўхтатадиган бўлди, эвазига эса Мексика ўзининг АҚШ билан шимолий чегарасига 10 минг аскар жўнатади, назоратни кучайтиради. Хусусан, Америкага ноқонуний наркотик моддалар, жумладан фентанил оқими тўхташи керак. Вашингтон эса АҚШдан Мексикага оғир ўқотар қуролларнинг ноқонуний ўтмаслигини таъминлаш мажбуриятини олади.

Шундай қилиб, Мексика ва Канаданинг 25 фоизлик божлари ҳозирча бекор қилинган, фақат Хитойга белгиланган 10 фоиз амалда қолмоқда.