Маск Россия дезинформация тармоғининг Зеленский ҳақидаги фейк видеосини тарқатди

Америкалик ишбилармон Илон Маск X ижтимоий тармоғида жаҳон юлдузларининг Украинага ташрифи молиялаштирилгани ҳақидаги сохта хабарни тарқатди, бу Россиянинг «Матрёшка» дезинформация тармоғи билан боғлиқ, деб ёзди The Insider.

На видео, которое перепостил Маск, утверждается, что USAID тратило средства американских налогоплательщиков на организацию поездок знаменитостей для поддержки Зеленского.

Этот ролик, вероятно, имеет отношение к российской сети дезинформации «Матрешка», впервые замеченной… pic.twitter.com/xQiQ4PIm5n

— The Insider (@the_ins_ru) February 6, 2025

Маск жойлаган видеода АҚШ Халқаро тараққиёт агентлиги (USAID) Украина президенти Зеленскийни қўллаб-қувватлаш мақсадида таниқли шахслар саёҳатларини ташкил қилиш учун америкалик солиқ тўловчиларнинг пулларини сарфлагани айтилади.

Гўё ENews медиа компанияси томонидан эълон қилинган сохта видеога кўра, бир қанча машҳур актёрлар Украинага боргани учун катта пул олган: Анжелина Жоли - 20 миллион доллар, Орландо Блум - 8 миллион доллар, Бен Стиллер - 4 миллион доллар, Жан-Клод Ван Дамм - 1,5 миллион доллар.

Бен Стиллер бу дезинформацияга зудлик билан жавоб қайтариб, Украинага саёҳатини тўлиқ ўз ҳисобидан молиялаштирганини ва USAID ташкилотидан ҳеч қандай ёрдам олмаганини айтди. Украина дезинформацияга қарши кураш маркази раҳбари Андрей Коваленко ҳам ENews манбаларида бундай материал ҳеч қачон чоп этилмаганини таъкидлади.

Раддияларга қарамай, Маск бу ёлғон контентни узоқ вақт давомида Х саҳифасидан олиб ташламади, бу вақт ичида пост остида ижтимоий тармоқнинг изоҳи пайдо бўлди. Унда материал ENews услубига тақлид қилиб яратилган бўлса-да, медиакомпания бундай янгиликни эълон қилгани ҳақида ҳеч қандай далил йўқлиги айтилади.

2024 йил декабрь ойида Bluesky ижтимоий тармоғида Россиянинг «Матрёшка» дезинформация кампанияси пайдо бўлгани аниқланди. Уни биринчи марта Bellingcat асосчиси Элиот Хиггинс пайқади. Кампания олтита сохта видеони ўз ичига олган бўлиб, уларнинг барчаси бир хил тамойил асосида ишланган: дастлаб ҳақиқий шахс (мутахассис, профессор ёки нуфузли университет талабаси) ўзини таништиради ва экология каби мавзуни баён қилади, сўнгра маърузачининг иштирокисиз ўша овоз Украинага қарши ривоятларни тарқата бошлайди, Ғарбни Россия билан муносабатларни яхшилашга чақиради, шунингдек, Зеленскийни обрўсизлантиришга уринади.