Аляскада бедарак йўқолган самолёт парчалари топилди, бортдагилар ҳалок бўлган

Аляскада Bering Air авиакомпаниясининг йўловчи самолёти ҳалокатга учради, бортдаги 10 киши ҳалок бўлди, деб хабар бермоқда Associated Press.

7 феврал куни Cessna 208 Caravan самолёти Уналаклит ва Ном шаҳарлари ўртасида чартер рейсини бажараётган эди. Қўнишдан сал олдин, Аляска кўрфази устида парвоз қилаётганда самолёт радарлардан ғойиб бўлган. Эртаси куни қутқарувчилар унинг парчаларини топди.

Ҳодисага нима сабаб бўлгани ҳозирча номаълум. Самолёт бортидаги барча одамлар — тўққиз нафар йўловчи ва бир учувчи ҳалок бўлган.

Аляскада бундан аввалги йирик авиаҳалокат 2013 йилда юз берганди, ўшанда юк лайнери қулаши оқибатида ўн киши ҳалок бўлган.

Эслатиб ўтамиз, 29 январ куни кечқурун Вашингтондаги Роналд Рейган аэропорти яқинида American Airlines йўловчи самолёти ва АҚШ армиясининг Black Hawk вертолёти ҳавода тўқнашиб кетган, иккаласи ҳам Потомак дарёсига қулаганди. Самолётда 64 киши, вертолётда эса уч нафар ҳарбий хизматчи бўлган. Фожиа оқибатида ҳеч ким тирик қолмаган.

31 январ куни эса АҚШда беморни олиб кетаётган кичик тиббий самолёт уйлар устига қулаб тушди. Филаделфия шаҳрида қулаган кичик тиббий самолёт Мексикага кетаётганди. Унинг бортида тўрт нафар экипаж аъзоси, бир бемор ва унинг онаси – жами 6 киши бўлган, улардан ҳеч бири омон қолмаган.