АҚШ Украина тинчлик режасини ишлаб чиқишга Европани жалб қилади

Украинадаги урушни тугатиш режасини якунлашдан олдин Кит Келлог Европа иттифоқчилари билан музокаралар олиб бориш ниятида. Мюнхенда у ушбу режанинг алоҳида элементлари ҳақида гапиради.

Кит Келлог Фото: Drew Angerer / Getty Images

Доналд Трамп маъмурияти Европадаги ҳамкорларига музокаралар столидан жой бериш мақсадида Украинадаги урушни тугатиш режасини тўхтатиб қўйди. Бу ҳақда 10 феврал, душанба куни The Telegraph нашри хабар қилиб, АҚШ президентининг Украина ва Россия бўйича махсус вакили Кит Келлог тинчлик режасини якунлашдан олдин НАТО иттифоқчилари билан индивидуал музокаралар ўтказишга ваъда берганини таъкидлади.

НАТО мамлакатлари «бош вазирлари ва президентлари» билан музокаралар чоғида у Киев ва Москва ўртасида мумкин бўлган тинчлик келишуви шакли ва Европа давлатлари бу жараёнга қандай ҳисса қўшиши мумкинлиги ҳақидаги фикрларини билиш ниятида, деган у европалик дипломатларга.

Генерал Келлог 14—16 феврал кунлари бўлиб ўтадиган Мюнхен хавфсизлик конференциясида Украина бўйича тинчлик режасининг алоҳида элементларини тақдим этишга ваъда берди, деб ёзади The Telegraph. Аввалига Американинг урушни тугатиш режаси Мюнхенда тақдим этилиши кутилганди, бироқ Трампнинг махсус вакили кейинроқ буни рад этди. Bloomberg агентлигига кўра, Келлог Трампга яқин ҳафталарда Украинадаги урушни тугатиш вариантларини тақдим этиши кутилмоқда.

Европага сафари давомида Келлог конференцида иштирок этишдан ташқари, Киев ва бошқа Европа пойтахтларига ташриф буюришни режалаштирмоқда.

Уолтц: АҚШ Украина хавфсизлиги кафолатларини Европага юклайди

АҚШ президенти Доналд Трамп маъмуриятининг юқори мартабали расмийлари келаси ҳафта европалик амалдорлар билан учрашиб, Украинадаги кенг кўламли урушни тугатиш йўлларини муҳокама қилади. Бу ҳақда 9 феврал куни АҚШ президентининг миллий хавфсизлик бўйича маслаҳатчиси Майк Уолтцга таяниб, Associated Press хабар берди. Уолтцга кўра, АҚШ давлат котиби Марко Рубио, мудофаа вазири Пит Хегсет, вице-президент Жей Ди Вэнс ҳамда АҚШнинг Украина ва Россия бўйича махсус вакили Кит Келлог Европага сафар қилади.

Шу куни Майк Уолтц NBC телеканалига берган интервюсида айнан Европа Украинага уруш тугаганидан кейин хавфсизлик кафолатларини бериши кераклигини, АҚШ эса Киевга ҳарбий ёрдам учун сарфлаган харажатларини қоплаш ниятида эканини айтди. «Биз бу харажатларни қоплашимиз керак ва бу украиналиклар билан нодир металлар, табиий ресурслар, нефт-газ ва бизнинг ресурсларимизни сотиб олиш бўйича ҳамкорлик бўлади», деди Трамп маслаҳатчиси.

АҚШ президенти «урушни тугатиш» ва «барча томонларни», жумладан Хитой, Ҳиндистон ва Яқин Шарқни музокараларга жалб этиш ниятида, дея таъкидлади Уолтц. Шунингдек, у, агар Москва мулоқотдан бош тортса, Трамп Россияга қарши «солиқлар, тарифлар, санкциялар» жорий этишдан қўрқмаслигини қўшимча қилди.