Австрияда Сурия фуқароси пичоқ билан одамларга ҳужум қилди

Австрия жанубидаги Филлах шаҳрида юз берган қуролли ҳужум оқибатида бир киши ҳалок бўлди ва беш киши жароҳат олди, деб ёзади BBC News.

Австрия полицияси маълумотларига кўра, 15 феврал куни шаҳар марказий майдонида номаълум шахс пичоқ билан одамларга ҳужум қилган. Ҳодиса оқибатида 14 ёшли ўсмир ҳалок бўлган. Шунингдек, 14-32 ёш оралиғидаги беш киши ҳам яраланган бўлиб, уларнинг икки нафари оғир аҳволда.

Жиноятни содир этишда гумонланган шахс полиция томонидан қўлга олинган. Аниқланишича, у 23 ёшли суриялик қочоқ бўлиб, Австриядан сиёсий бошпана сўраган ва мамлакатда яшаш ҳуқуқини берувчи рухсатномага эга. Йигит нима сабабдан бундай жиноятга қўл ургани номаълум.

Ҳужум қилган шахсни жиноятга гувоҳ бўлган курер ушлашга ёрдам берган. Асли суриялик бўлган ушбу фуқаро янги ҳужумнинг олдини олиш мақсадида машинаси билан жиноятчини туртиб юборган.

ОАВга кўра, гумонланувчи полиция томонидан қўлга олинган вақтда скамейкада юзида табассум билан ўтирган ҳолатда бўлган.

Аввалроқ Мюнхенда намойишчиларни автомобил босиб кетилгани тўғрисида хабар берилганди. Ҳодиса оқибатида камида 28 киши жабрланган. Бавария бош вазирига кўра, бу мақсадли ҳужум бўлгани тахмин қилинмоқда.