Россиянинг Украинадаги тасдиқланган йўқотишлари қарийб 100 минг кишига етди

Украинага қарши кенг кўламли уруш бошланганидан бери ҳалок бўлган россиялик ҳарбийлар сони 95 минг 26 кишига етди — уларнинг барчаси шахси тасдиқланган. Охирги бир ойнинг ўзида — 24 январдан 21 февралгача ушбу рўйхатга 5007 нафар ҳарбий хизматчи киритилган, деб хабар беради BBC рус хизмати ва «Медиазона».

Ҳалок бўлганларнинг энг кўпи тўғридан тўғри колониядан урушга юборилган маҳкумлардир. Умумий ҳисобда 16 минг 171 нафар маҳкумнинг ҳалок бўлгани тасдиқланган. Аммо «Вагнер» ХҲК ҳужжатлари билан танишган журналистларнинг таъкидлашича, маҳкумлар Россия армиясининг уч йилдан бери давом этаётган урушдаги йўқотишларининг учдан бир қисмини ташкил этиши мумкин.

Шунингдек, журналистлар ДХР ва ЛХРдаги қуролли тузилмаларнинг 21 мингдан 23,5 минг нафаргача ҳарбийси ҳалок бўлганини ҳисоблаган. Гап асосан мажбурий сафарбар этилган ва минимал тайёргарлик билан фронтга жўнатилганлар ўлими ҳақида кетмоқда. Ушбу йўқотишларнинг катта қисми урушнинг биринчи йилига тўғри келади. Россия расмий бўлинмалари ушбу давр оралиғида деярли шунча йўқотишга учраган — 25 минг 769 киши. BBC’га кўра, Россия томонидан жанг қилиб, ҳалок бўлган ҳар 10 кишининг уч нафари — бу маҳкумлар, икки нафари — ДХР ва ЛХР аҳолисидир. Ҳар икки тоифадагилар ҳам Россия жамиятининг ҳаётида иштирок этмаган.

Шу билан бирга, Россия армиясининг Украинага қарши урушдаги реал йўқотишлари тасдиқланган маълумотлардан анча кўп бўлиши мумкин — 146 мингдан 211 минг кишигача. «ДХР ва ЛХРнинг йўқотишлари билан Россия томонида ҳалок бўлганлар сони 167—234 минг оралиғида», — дейилади хабарда.

Пентагон маълумотларига кўра, ўтган йилнинг ноябрида Россиянинг умумий йўқотишлари 615 минг кишини ташкил этган: 115 минг киши ўлдирилган ва 500 минг ҳарбий яраланган. Буюк Британия Мудофаа вазирлиги Россия армияси йўқотишларини 610 минг кишига баҳолаган. The Economist’нинг таъкидлашича, бу Россиянинг 1945 йилдан кейинги можаролардаги барча ҳарбий йўқотишларидан ортиқ. Ўтган йилнинг июнида РФ президенти Владимир Путин Украина Қуролли кучларининг йўқотишлари ҳақида гапириб, уларни Россияники билан таққослаган эди. Унинг сўзларига кўра, урушнинг 27 ойи давомида Россия 135 минг кишисидан айрилган.