БМТ Хавфсизлик Кенгаши илк бор Украинадаги уруш бўйича резолюцияни қабул қилди

Бирлашган Миллатлар Ташкилоти Хавфсизлик Кенгаши АҚШнинг «Тинчлик сари йўл» резолюциясини қабул қилди, унда Украинадаги урушни тезда тўхтатиш кераклиги айтилган, аммо Россия тажовузкор сифатида кўрсатилмаган. 24 феврал, душанба куни бўлиб ўтган овоз беришда ҳужжатни Хавфсизлик Кенгашининг 15 аъзосидан 10 таси – хусусан, Россия, АҚШ ва Хитой қўллаб-қувватлади. Яна беш давлат, жумладан унинг доимий аъзолари Буюк Британия ва Франция овоз беришда бетараф қолган.

Украинада уруш бошланганидан бери биринчи марта БМТ Хавфсизлик Кенгаши бу ҳақда резолюция қабул қила олди. Россиянинг БМТдаги вакили Василий Небензя буни тинч йўл билан ҳал қилиш йўлидаги кейинги ҳаракатлар учун бошланғич нуқта деб атади.

БМТ Бош Ассамблеяси Украинадаги уруш юзасидан икки хил резолюция қабул қилди

Кун бошида БМТ Бош Ассамблеяси Россиянинг Украинага қарши урушига баҳо беришда бир-биридан фарқ қилувчи иккита резолюцияни қабул қилди.

Биринчи ҳужжат Украина ва Европа Иттифоқи давлатлари томонидан тузилган. Унда Россиянинг Украинанинг босиб олинган ҳудудларидан зудлик билан ўз қўшинларини олиб чиқиб кетиш ва ҳарбий ҳаракатларни тўхтатиш тўғрисидаги тўғридан тўғри талаб бор, бу БМТнинг аввалроқ қабул қилинган қарорларига мос келади. Уни 93 давлат қўллаб-қувватлади, 65 давлат бетараф қолди, 18 давлат қарши овоз берди, жумладан, Россия ва АҚШ.

Иккинчи резолюция АҚШ томонидан тайёрланган. Унда Россия Федерациясининг ҳарбий тажовузкорлиги қораланмайди, уруш «можаро» деб аталади, Украинанинг Россия томонидан босиб олинган ҳудудлари, Россия Федерацияси томонидан халқаро ҳуқуқ нормаларининг бузилиши ёки мамлакатнинг ҳудудий яхлитлигини тиклаш зарурати ҳақида сўз юритилмайди.

Резолюция лойиҳасига Европа давлатлари ташаббуси билан ўзгартиришлар киритилди, шундан сўнг унда Украинанинг ҳудудий яхлитлиги ва «адолатли тинчлик»ка эришиш ҳақидаги жумлалар пайдо бўлди. Ҳужжатни 93 давлат қўллаб-қувватлади. 72 давлат, жумладан АҚШ ва Украина бетараф қолди. Россия қарши овоз берди.