Тошкентдаги хонадонларнинг бирида газ портлади

Фавқулодда вазиятлар вазирлиги Яшнобод туманида газ чақнаши билан боғлиқ ҳолат юзасидан маълумот берди.

Қайд этилишича, 26 феврал куни соат 17:37 да Тошкент шаҳар ФВБга Яшнобод тумани «Дўстобод» МФЙ, Махтумқули кўчасида жойлашган кўп қаватли уйларнинг биридаги хонадон ошхонасида газ-ҳаво аралашмасининг чақнаши содир бўлгани тўғрисида хабар келиб тушган.

Зудлик билан айтилган манзилга ёнғин-қутқарув экипажлари етиб борган. Ҳодиса натижасида ёнғин содир бўлмаган.

Чақнаш оқибатида 1 нафар фуқаро куйиш тан жароҳати олиб, шифохонага юборилган. Воқеа жойига ФВБ, ИИББ, ССБ, прокуратура ва бошқа тегишли ташкилотлар ходимлари етиб борган.

«Ҳозирда мазкур ҳолат юзасидан дастлабки терговолди суриштирув ишлари олиб борилмоқда», — дейилади хабарда.

Эслатиб ўтамиз, феврал ўрталарида Бухоро вилоятининг Ғиждувон туманида хонадон портлагани тўғрисида хабар берилганди. Хонадонда иситиш печидан газ сизиб чиқиб тўпланган ҳамда уй эгалари чироқни ёқиши оқибатида чақнаш содир бўлган. Оқибатда бир киши ҳодиса жойида вафот этган.