Трампнинг тарафдори: Украина билан келишув имзоланади

Республикачи конгрессмен Брайан Фицпатрик Украина ва Қўшма Штатлар ҳукуматлари ўртасида келажакда Украина ресурслари бўйича келишув имзоланиши бўйича янги келишувга эришилганини эълон қилди. «Биз бу поездни 100 фоиз йўлга қайтармоқдамиз. Тез орада минераллар бўйича келишув имзоланади, бу эса Қўшма Штатлар ва Украина ўртасида кучли узоқ муддатли иқтисодий ҳамкорликка олиб келади ва пировардида, табиийки, хавфсизлик бўйича кўмакка олиб келади», деб ёзди у 3 март, душанба куни кечқурун Х ижтимоий тармоғида.

Вакиллар палатасида Украина Кокусининг ҳамраиси бўлган Фицпатрик, шунингдек, «Европа ҳаракатни кучайтириши ва ўз вазифасини бажариши кераклигини ва бунинг учун кўрсатмалар бўлишини» таъкидлади ҳамда воқеаларни кузатишни тавсия қилди.

Ўз навбатида, Андрей Ермак Фицпатрик билан музокаралар олиб борилганини тасдиқлади. «Биз адолатли тинчликка эришиш ва АҚШ билан фойдали қазилмалар тўғрисида келишувга эришиш масалаларини муҳокама қилдик. Бизга иқтисодий шериклик керак. Ўзаро тушуниш бор, биз давлатларимиз раҳбарлари қабул қилиши керак бўлган қарорга интиляпмиз», деб ёзди президент девони раҳбари ижтимоий тармоқларда.

Трамп келишувни янгилаш имконияти ҳақида 4 март куни гапириб бериши мумкин

Аввалроқ АҚШ президенти Доналд Трамп америкалик журналистлар билан суҳбатда ўз мамлакатига Украинадаги нодир металларга кириш ҳуқуқини берувчи келишувни «ўлик» деб ҳисобламаслигини айтди. Эртаси кунги нутқида бу ҳақда батафсилроқ гапиришга ваъда берди. Бу билан у бир кун аввал АҚШ молия вазири Скотт Бессентнинг CBS News телеканалига берган интервюсида Украина билан нодир металлар бўйича келишув ҳозирда «музокаралар столида йўқ» деган баёнотини тасдиқламади.