ҲАМАС Трампнинг таҳдидига қарамай гаровга олинганларни озод қилмади

Фаластиннинг ҲАМАС гуруҳи АҚШ президенти Доналд Трампнинг гаровга олинган барча исроилликларни зудлик билан озод қилиш ҳақидаги «охирги» таҳдидини рад этди. Бу ҳақда Fox News хабар берди.

Хусусан, ҲАМАС вакили Абдуллатиф ал-Қануа сўзларига кўра, «гаровдаги қолган исроилликларни озод қилишнинг энг яхши йўли ўт очишни тўхтатиш келишувининг иккинчи босқичи бўйича музокаралар ўтказишдан» иборат.

Маълумки, 42 кун давом этган оташкесимнинг биринчи босқичи 2 март куни якунига етган. Иккинчи босқич март ойи бошида бошланиши керак эди, бироқ ҳозирча фақат чекланган тайёргарлик музокаралари олиб борилди.

Аввалроқ, Трамп Вашингтонда гаровга олинган ва озод қилинган исроилликлар билан учрашганидан кейин ҳамасчиларга қарата мурожаат қилиб, уларни «охирги марта огоҳлантираётганини» айтди.

«Ҳозир барча гаровга олинганларни, кечиктирмасдан озод қилинг ва ўлдирган одамларингизнинг жасадини зудлик билан қайтаринг, акс ҳолда ҳаммаси сиз учун тугайди», деб ёзди у ижтимоий тармоқда.

Трамп «Исроилга «ишни якунлаш» учун зарур бўлган ҳамма нарсани юбораётганини» айтди ва «агар айтганимни қилмасангиз, ҲАМАС аъзоларидан ҳеч ким хавфсизликда бўлмайди», деб қўшимча қилди.

Трамп Ғазо аҳолисига ҳам мурожаат қилди.

«Сизни ажойиб келажак кутмоқда, лекин гаровдагиларни ушлаб турганингизда эмас. Агар шундай қилсангиз, ўласиз! Ақлли қарор қабул қилинг. Гаровга олинганларни ҳозир озод қилинг, акс ҳолда бунинг ҳақини кейинчалик дўзахда тўлайсиз!».

Fox News нашрининг эслатишича, ҲАМАС 2023 йил 7 октябрда қўлга олинган 24 кишини гаровда ушлаб турибди. Шунингдек, биринчи ҳужумда ҳалок бўлган 34 кишининг жасади ва 2014 йилги урушда ҳалок бўлган аскарнинг жасадини сақламоқда.