Трамп Мексика ва Канада автомобил ишлаб чиқарувиларини бир ой муддатга бождан озод этди

Ушбу мамлакатлар ўртасидаги ўзаро тарифлар 2 апрелдан кучга киради. АҚШ президенти USMCA’га алоқадор компаниялар илтимосига кўра, уларга бир ойлик муҳлат берган.

Фото: AP

АҚШ президенти Доналд Трамп етакчи саноат вакиллари билан музокаралардан кейин Мексика ва Канада автомобил ишлаб чиқарувчиларига жорий этилган божни бир ойга кечиктирди, деб хабар беради Euronews.

«Биз «катта учлик» автомобил ишлаб чиқарувчилари билан гаплашдик. Биз USMCA орқали ҳар қандай автомобил етказиб берилишига жорий этилган божни бир ойга кечиктириш ниятидамиз», — дейди Оқ уй матбуот котиби Каролин Левитт.

Унинг таъкидлашича, ўзаро тарифлар барибир 2 апрелдан кучга киради, аммо USMCA’га алоқадор компаниялар илтимосига кўра, президент уларга бир ойлик муҳлат берган.

4 март куни АҚШнинг Канада ва Мексика товарлари импортига 25 фоизли божлари кучга кирди. Шунингдек, Хитойдан импорт қилинадиган маҳсулотларга 10 фоизли бож жорий этилди.

Трамп ўтган ойда барча автомобиллар, фармацевтика маҳсулотлари ва яримўтказгичлар импортига 2 апрелдан 25 фоизли бож жорий этилишини эълон қилганди. Бундан ташқари, у 1 апрелдан кучга кириши кутилаётган ўзаро тарифларни жорий этишга йўналтирилган савдо муносабатлари бўйича тергов ўтказишга оид фармонни имзолаган.

АҚШ, Мексика ва Канада ўртасидаги битимга кўра (УСМCА), ушбу мамлакатлар ўртасида савдони амалга оширишда нол фоизли бож ҳуқуқини қўлга киритиш учун автомобил эҳтиёт қисмларининг 75 фоизи Шимолий Америкада ишлаб чиқарилган бўлиши керак.

Левиттнинг сўзларига кўра, 5 март куни Оқ уй вакиллари Stellantis, Ford ва General Motors компаниялари раҳбарлари билан учрашган. Трамп божларнинг жорий этилиши бир ойга кечиктирилишини эълон қилганидан кейин автомобил ишлаб чиқарувчилар акциялари қимматлашган. Хусусан, Ford Motor акциялари 3,65 фоизга, General Motors — 1,76 фоизга, Stellantis акциялари эса 2,46 фоизга ўсган.