ЖССТ: 1 млрд инсон эшитиш қобилиятини йўқотиши мумкин

Жаҳон соғлиқни сақлаш ташкилотининг Россиядаги офиси раҳбари Ботир Бердиқличев бугунги кунда 1 миллиарддан ортиқ инсон мусиқа тинглаш одатлари туфайли эшитиш қобилиятига шикаст етказиш хавфи остида эканини маълум қилди.

«1 миллиарддан ортиқ ёшлар нотўғри тинглаш одатлари туфайли эшитиш қобилиятини йўқотиш хавфи остида экани жуда ташвишли, аммо тўғри хатти-ҳаракатлар билан бунинг олдини олиш мумкин», — дейди у.

ЖССТ вакилининг сўзларига кўра, 2050 йилга бориб, 2,5 миллиардга яқин одамнинг эшитиш қобилиятида бузилишлар кузатилади ва камида 700 миллион киши эшитиш қобилиятини йўқотгани сабабли реабилитацияга муҳтож бўлади.

Эшитиш қобилиятига салбий таъсир кўрсатадиган омиллардан бири — бу эшитиш ҳужайраларига зарар етказиши мумкин бўлган жуда баланд товушлар таъсири. Аммо вақтида чора кўриш орқали бунинг оқибатида юзага келадиган ҳолатларнинг 60 фоизининг олдини олиш мумкин. Энг самарали профилактик чора — тинглашда хавфсизлик нормаларига риоя қилишдир.

Мусиқани хавфсиз тинглаш учун маълум стандартлар мавжуд, аммо кўплаб ёшлар уларни эътиборсиз қолдиради, бу эса эшитиш қобилиятини йўқотиш хавфини оширади. Ҳозирги вақтда дунё аҳолисининг тахминан 5 фоизи эшитиш қобилиятини йўқотишдан азият чекмоқда.