Зеленский Овал кабинетдаги тортишув учун Трампдан кечирим сўради — АҚШ президентининг махсус вакили

Украина президенти Володимир Зеленский феврал охирида Овал кабинетда юз берган тортишув учун АҚШ президенти Доналд Трампдан кечирим сўради. Бу ҳақда Fox News эфири вақтида Трампнинг Яқин Шарқ бўйича махсус вакили Стиф Уиткофф маълум қилди.

«Зеленский президентга мактуб йўллади. У Овал кабинетда юз берган можаро учун кечирим сўради. Ўйлайманки, бу муҳим қадам бўлди ва бизнинг жамоаларимиз, шунингдек, ушбу воқеага алоқадор украиналиклар ва европаликлар ўртасида кўплаб мунозаралар бўлиб ўтди», — дейди Уиткофф.

АҚШ президентининг махсус вакили айтган гапларда у қандай «кечирим сўраш»ни назарда тутгани ва Зеленский Трампга қанақа мактуб йўллагани тушунарсиз.

Украина президенти 4 март куни Х ижтимоий тармоғига Оқ уйдаги учрашув «кутилганидек бўлмагани» ва бундан афсусда экани ҳақида ёзганди. «Бундай бўлганидан афсусдаман. Барчасини тўғрилаш вақти келди. Келгуси ҳамкорлик ва мулоқот конструктив бўлишини истаймиз», — дейилади Зеленскийнинг постида.

Ўз навбатида конгресс қаршисида чиқиш қилган Трамп Украина президентидан «муҳим мактубни олгани»ни маълум қилди. АҚШ етакчиси «хабар учун миннатдор эканини» қўшимча қилганди. Украинанинг Қўшма Штатлардаги элчиси Оксана Маркарова Зеленский Трампга алоҳида мактуб ёзмаганини айтиб, АҚШ президенти конгрессга мурожаатида Украина президентининг 4 мартдаги постидан иқтибос келтирганини билдирди.

28 феврал куни Овал кабинетда журналистлар қаршисида ўтказилган мулоқотда Зеленский АҚШ президенти Доналд Трамп ва вице-президент Жей Ди Вэнс билан тортишиб қолганди, шундан кейин Украина президенти Оқ уйни муддатидан олдин тарк этди, нодир металлар бўйича битим имзоланмай қолди.

Кейинроқ АҚШ давлат котиби Марко Рубио Оқ уйдаги тортишув сабаб Зеленский кечирим сўрашини кутишаётганини маълум қилди. Украина президенти эса кечирим сўраш ниятида эмаслигини билдирди.