Бразилияда иқлим бўйича ўтказиладиган саммитга тайёргарлик кўриш учун дарахтлар кесиб ташланди

Бразилияда ноябр ойида COP30 иқлим саммити ўтказилади. Мамлакат ҳукумати саммит ўтказиладиган жойга йўл ётқизиш мақсадида Амазония ўрмонларини кесмоқда.

Фото: BBC

Бразилияда Амазония тропик ўрмонларини кесиш бошланди. Бу Белен шаҳрини 2025 йил ноябр ойида ўтказиладиган COP30 иқлим саммити ўтказиладиган жой билан боғловчи йўлни қуриш учун амалга оширилмоқда, деб хабар беради BBC.

Қайд этилишича, саммитда иштирок этиш учун 50 мингга яқин одам ташриф буюради.

Расмийлар ёввойи ҳайвонлар учун махсус ўтиш йўлакларини ташкил этишни ваъда қилган бўлсада, кўплаб маҳаллий аҳоли ва табиат ҳимоячилари ўз норозиликларини билдирмоқда. Уларнинг ҳисоблашича, ўрмонни кесиш иқлим ўзгаришига қарши курашга бағишланадиган саммит ғоясига зиддир.

Лойиҳага кўра, янги қуриладиган йўл атрофига дарахтлар экилади. Айни вақтда экскаваторлар қўриқланадиган майдон орқали ўтадиган йўлни тайёрлаш ишлари билан шуғулланмоқда.

Клаудио Верекете исмли фуқаро йўл ўтказиладиган ҳудуддан тахминан 200 метр узоқликда яшайди. Олдинлари у дарахтлар мевасини териб, сотиш орқали даромад қилган. «Барчаси йўқ қилинди. Энди оилани боқиш учун даромадимиз йўқ», — дейди у.

Унинг сўзларига кўра, эркак штат ҳукуматидан ҳеч қанақа компенсация олмаган ва айни вақтда ғамлаб қўйган маблағлари ҳисобига кун кечирмоқда.

Штат ҳукуматининг инфратузилма бўйича вакили Адлер Сивейра ушбу автомагистрални COP30 доирасида ўтказиладиган тадбирлар учун амалга ошириладиган 30 та лойиҳадан бири деб атади. Унинг айтишича, йўл бўйида ҳайвонлар ҳаракатланиши учун алоҳида ўтиш жойлари, велосипед йўлаклари ва қуёш орқали ёритиш тизимлари бўлади.

#Бразилия #иқлим ўзгариши