Зеленский яна Москвани урушни тугатишни истамасликда айблади

Украина президенти Володимир Зеленский яна бир бор Россияни урушни тугатишдан манфаатдор эмасликда айблади. «Ушбу ҳафтада бизнинг шаҳарлар ва жамоатларимизга юзлаб ҳужумлар уюштирилди. Руслар 1020 дан ортиқ ҳужумкор учувчисиз учоқлар, деярли 1360 та бошқариладиган ҳаво бомбалари ва 10 дан ортиқ турли ракеталарни учирди. Урушнинг тезроқ тугашини истаганлар бундай қилмайди», деб ёзди Зеленский ижтимоий тармоқда.

Украина президенти яна бир бор бутун цивилизациялашган дунё «Россияни ўз агрессиясини тўхтатишга мажбурлаш учун унга биргаликда босим ўтказиши» зарурлигини, янги «ҳал қилувчи чоралар», жумладан, санкцияларни кучайтириш кераклигини таъкидлади. «Украина, Европа, Америка ва дунёда тинчликни истаган ҳар бир киши – биз биргаликда адолатли ва мустаҳкам тинчликни таъминлай оламиз», — дея хулоса қилди у.

Бундан уч кун аввал Зеленский Кремлни Россия ва Украина ўртасида АҚШ ташаббуси билан тузилган тинчлик келишувини атайлаб кечиктиришда айблаган эди. «Афсуски, бир кундан ортиқ вақтдан бери (Жиддадаги учрашувдан кейин) дунё билдирилган таклифлар юзасидан Россиядан мазмунли жавоб эшитмаяпти. Бу эса айнан Россия урушни давом эттиришга интилаётганини ва тинчлик бошланишини имкон қадар кечиктиришга ҳаракат қилишини яна бир бор тасдиқлайди», — деб ёзди у 13 март куни. Украина президенти, шунингдек, «АҚШ босими Россияни урушни тугатишга мажбур қилиш учун етарли бўлишига» умид билдирди.

ЕИ вақтинчалик сулҳ тузилса ҳам Украинани қуроллантиришда давом этади

Европа Иттифоқи 30 кунлик оташкесимга эришилса, Украинага қурол етказиб беришни тўхтатмоқчи эмас. Бундай фикрни 14 март куни Европа Иттифоқи ташқи ишлар кенгаши йиғилиши олдидан Европа Иттифоқининг бир қанча давлатларидан келган қатор дипломатлар билдиришди.

«Европа Иттифоқи Украинанинг тинчлик музокараларида энг кучли позицияда бўлишини таъминлашга интилмоқда, шунингдек, Трамп айтганидек «ёмон» келишувдан воз кечиб, музокаралар учун энг қулай вақтни танлаши мумкин. Агар тажовузкор буни талаб қилса, Европа Иттифоқи ва унинг аъзолари Киевга қурол етказиб беришни тўхтатади, деб ўйламайман», — деди Брюсселдаги брифингда европалик дипломат.

Яна бир дипломат, шунингдек, потенциал ўт очишни тўхтатиш вақтида Украина қуролланган бўлиши кераклигини ва ҳеч қандай ҳолатга йўл қўйиб бўлмаслигини таъкидлаб ўтди.