Кремл: Россия ва АҚШ 24 март куни ғалла битимини тиклаш бўйича музокаралар ўтказади

Россия ва АҚШ делегациялари Қора денгиз акваториясида кемалар хавфсизлигига оид «Қора денгиз ташаббуси»нинг қайта тикланиш имконияти юзасидан музокаралар олиб боради. Бу ҳақда РФ президентининг ёрдамчиси Юрий Ушаков маълум қилди.

Унинг сўзларига кўра, бу борадаги маслаҳатлашувлар 24 март куни Ар-Риёдда бўлиб ўтади. Россия делегациясига музокараларда Федерация Кенгашининг халқаро ишлар бўйича қўмитаси раҳбари Григорий Карасин ва Федерал хавфсизлик хизмати директори маслаҳатчиси Сергей Беседа бошчилик қилади.

«Эслатиб ўтаман, 2022 йил июл ойида тегишли пакет келишувлари БМТ бош котиби Антониу Гутерришнинг кўмаги ва иштирокида имзоланган эди, бироқ бу келишувлар тўлиқ ҳажмда амалга ошмади», — дейди Ушаков.

АҚШ президентининг махсус вакили Стив Уиткофф олдинроқ АҚШ ва Россия делегацияси 23 март куни Жиддада музокаралар ўтказишини маълум қилганди. Шу билан бирга, РФ президентининг матбуот котиби Дмитрий Песков 20 март куни томонлар «охирги нюансларни келишиб олгани», музокаралар 23 мартда эмас, бошқа куни ўтказилишини айтганди.

Песковнинг сўзларига кўра, Саудия Арабистонида Қора денгиз ғалла ташаббусини қайта тиклашдан ташқари, Россия—Украина урушини тугатишнинг бошқа «нюанслари» ва «жиҳатлари» муҳокама қилинади.

Қора денгиз ғалла ташаббуси — бу Украина ғалласини экспорт қилиш бўйича келишув бўлиб, у 2022 йил июлидан 2023 йил июлигача амал қилган. Ушбу битим Туркия ва БМТ воситачилигида имзоланган. Россия ушбу келишувнинг Россия ўғитларига оид қисми бажарилмаганини таъкидлаган. Орадан бир йил ўтиб, Россия уни узайтиришдан бош тортган.