Олимлар Антарктидадан ажралиб чиққан айсберг остида фаол экотизим мавжудлигини аниқлади

Шмидт номидаги Океан институти мутахассислари Антарктидадан ажралган улкан А-84 айсберги остида шаклланган денгиз тубини биринчи бўлиб ўрганди. Тадқиқотчилар ўнлаб ёки ҳатто юзлаб йиллар давомида муз остида яшаб келган бой ва хилма-хил экотизимга дуч келди.

2025 йил 13 январдан Георг VI шелф музлигидан ажратилган айсбергнинг майдони 510 километр квадрат километрни ташкил этади.

Қайд этилишича, масофадан бошқариладиган ROV Subastian қурилмаси ёрдамида тадқиқотчилар 1 300 метр чуқурликдаги денгиз тубини ўрганган. Улар катта маржонлар, муз балиқлари, улкан денгиз ўргимчаклари ва саккизоёқлар яшайдиган экотизимни аниқлади. Олимларнинг тахминига кўра, ушбу жонзотлар ўнлаб ёки ҳатто юзлаб йиллар давомида муз остида мавжуд бўлиб келган.

Одатда, чуқур сув экотизимлари озиқ моддаларни ташқи манбалардан олади. Бироқ ушбу ҳудуд 150 метр қалинликдаги муз остида қуёш нури ва ташқи ресурслардан тўлиқ узилган эди. Мутахассисларнинг таъкидлашича, ушбу экотизим океан оқимлари орқали келадиган озиқ моддалар ҳисобига яшаб келган.

Биологик тадқиқотлардан ташқари, мутахассислар минтақа геологияси ва физик океанографияси бўйича ҳам маълумотлар тўплаган. Улар автоном сувости қурилмалари ёрдамида муз эриши натижасида ҳосил бўлган сув океаннинг кимёвий ва физик хусусиятларига қандай таъсир кўрсатишини ўрганган. Ушбу маълумотлар иқлим ўзгариши Антарктида муз қоплами ва денгиз сатҳига таъсирини яхшироқ тушунишга ёрдам беради.

«Экспедиция илк бор шундай йирик шелф музлиги остидаги экотизимларни батафсил ўрганиш имконини берди. Ушбу кашфиёт ҳаёт қандай қилиб экстремал шароитларда мавжуд бўлиши мумкинлиги ҳамда иқлим ўзгаришининг Антарктидадаги таъсирини тушуниш учун ниҳоятда қимматли маълумотларни тақдим этди», — дейилади хабарда.