Дания тарихда илк бор аёлларни ҳарбий хизматга чақириш бошланади

Данияда 2025 йил 1 июлдан бошлаб нафақат эркаклар, балки аёллар ҳам ҳарбий хизматга чақирилади. Ушбу амалиёт режадагидан икки йил олдин бошланмоқда, дейди мамлакат мудофаа вазири Троэлс Лунд Поулсен.

Унинг сўзларига кўра, Копенгаген «мудофаа сиёсати ва хавфсизлик соҳасидаги ҳозирги вазият» туфайли шу каби қадамни ташлашга мажбур бўлмоқда.

Аёлларни хизматга чақириш ҳарбий хизмат муддатини тўрт ойдан 11 ойга қадар оширишни назарда тутувчи ислоҳотларнинг бир қисми ҳисобланади. Эркаклар сингари, агар етарли миқдорда кўнгиллилар тўпланмаса, аёлларнинг ҳарбий хизматга чақирилиши ҳам йиллик қуръа ташлаш орқали ҳал қилинади.

Данияда аёлларни хизматга чақириш 2027 йилдан бошланиши кутилган эди. Аммо мамлакат ҳукумати жорий йилдан армияда «эркаклар ва аёллар ўртасида тўлиқ тенгликни таъминлаш» учун ислоҳотларни тезлаштиришга қарор қилган.

Шу билан бирга, Дания ўзининг мудофаа харажатларини ҳам оширади. Феврал ойида бош вазир Метте Фредериксен 2025 йилда мамлакат армия эҳтиёжлари учун қўшимча 6,8 миллиард евро сарфлашини маълум қилганди. У «Россиянинг тажовузкор сиёсатини» мамлакат учун асосий таҳдид деб атаган.