Истанбулга камолчилар вакили Нури Аслан вақтинчалик ҳоким этиб сайланди

Инстанбул шаҳар суниципалитетда кўпчилик ўринларга эга бўлган Жумҳурият халқ партияси (ЖХП) вакиллари ўз сафдошлари Нури Асланнинг номзодини 177 овоз билан қўллаб-қувватлашган.

Адолат ва тараққиёт партиясидан (АТП) кўрсатилган номзод Зайнулобиддин Ўқул сайловда мағлуб бўлди. У 125 овоз жамғара олган, холос.

Натижалар эълон қилинганидан сўнг, экранда Акрам Имомўғлининг сурати намоён бўлди. Шу вақтда ЖХП депутатлари ўрниларидан қўзғалиб, уни туриб олқишлашган, АТП депутатлари эса йиғилишни тарк этишди.

Нури Аслан Истанбул шаҳар ҳокимлигига вақтинчалик раҳбар этиб сайланганидан сўнг, ЖХП раҳбари Ўзгур Ўзал жамоа билан хайрлашиб, 7 кундан бери яшаб келаётган шаҳар ҳокимлиги биносини тарк этган. У ҳокимлик биносида ётиб туриши учун олиб келган йиғма диванини ҳам олиб кетган.

Айрим таҳлилчиларнинг фикрича, Туркия президенти Ражаб Тоййиб Эрдўғаннинг «максимал режаси» — Имомўғлини терроризмда айблаб, унинг ўрнига бевосита ўз ҳокимиятидан тайинлаган номзодни қўйиш эди. Бироқ кенг қамровли норозилик намойишлари туфайли Имомўғлига нисбатан фақат коррупция айблови сақланиб қолди ва шу сабабли вақтинчалик ҳокимни сайлаш жараёни депутатлар овози билан ҳал этилган.

Ўзгур Ўзал муниципалитет биносидан чиқар экан, уни йўлнинг икки томонига тизилган одамлар қарсак билан кутиб олишган. Ўзал бу ғалаба орқали Истанбул шаҳрини ўз партияси қўлида сақлаб қолишга муваффақ бўлди.

Ўзалнинг баёнотига кўра, энди ҳар куни кечқурун Сарачанеда ўтказилаётган норозилик митинглари тўхтатилади. Энди бу ҳаракатлар Имомўғлини Силиври қамоқхонасидан озод этиш ва уни Туркия Республикаси президентлигига номзод сифатида кўрсатиш мақсадида бошқа жойларга кўчирилади.