Туркиядаги норозилик намойишлари: 1900 га яқин киши қўлга олинди

Туркияда олти кунлик оммавий намойишлар давомида ҳукумат 1879 кишини полицияга қаршилик кўрсатгани учун қўлга олди.

Фото: Huseyin Aldemir/AP/picture alliance

Туркияда Истанбул ҳокимлигига номзод этиб кўрсатилган Экрем Имамоғлу ҳибсга олиниши ортидан кенг кўламли намойишлар давом этмоқда. Туркия ички ишлар вазири Али Ерликая 27 март, пайшанба куни 19-25 март оралиғида Туркия ҳукумати томонидан 1879 киши қўлга олингани ҳақида маълум қилди.

Унга кўра, 260 киши ҳибсда қолмоқда, 662 нафар маҳбуснинг иши судда кўриб чиқилмоқда, 489 киши эса қўйиб юборилган.

Намойишчиларнинг барчаси ҳуқуқ-тартибот идораларига қаршилик кўрсатганликда айбланиб қўлга олинди, дея маълум қилди dpa нашрига Туркия ИИВ. Ерликаянинг сўзларига кўра, оммавий намойишлар чоғида 150 нафар полициячи яраланган. Туркияда оммавий йиғилишларни тақиқлаш 1 апрелга қадар узайтирилди.

Полиция куч қўлламоқда

Туркия полицияси 27 март куни Яқин Шарқ техника университетида сув тўплари, кўздан ёш оқизувчи газ ва пластик ўқлардан фойдаланган ҳолда талабалар намойишини тарқатиб юборди. Мухолифатдаги Жумҳурият халқ партияси депутати Мелиҳ Меричга кўра, талабалар матбуотга баёнот бермоқчи бўлган, аммо полиция рухсат бермаган.

#Туркия #намойиш