Amazon TikTokʼни сотиб олишга ариза берди

Amazon компанияси Хитойнинг ByteDance компаниясига тегишли TikTok ижтимоий тармоғининг Америка бўлинмасини сотиб олишга ариза берди, деб ёзмоқда The New York Times.

Қайд этилишича, таклиф АҚШ вице-президенти Жей Ди Вэнс ва савдо вазири Говард Лютникка мактуб шаклида йўлланган.

Газета суҳбатдошларининг таъкидлашича, TikTok тузилмасини ўзгартириш тўғрисидаги музокараларда иштирок этаётган турли томонлар Amazon таклифини жиддий қабул қилмаяпти.

Amazonʼнинг ўзи мазкур хабарларга изоҳ беришдан бош тортган.

NYT’нинг ёзишича, 2 апрел куни Трамп Оқ уйнинг юқори мартабали амалдорлари билан учрашув ўтказиш, TikTokʼнинг келажагини муҳокама қилишни режалаштирган. Потенциал битим ижтимоий тармоқ капиталига америкалик янги инвесторларни компанияни расман сотмасдан туриб жалб этишни ўзи ичига олиши мумкин.

2024 йил баҳорда АҚШ вакиллар палатаси TikTok Хитойнинг ByteDance компаниясидан ажратилмаса, мамлакатда ушбу ижтимоий тармоқни тақиқлаш имконини берадиган қонунни маъқуллаган эди. Конгрессменларнинг ҳисоблашича, TikTok миллий хавфсизликка таҳдид уйғотади, чунки Хитой ҳукумати ByteDance’ни илованинг америкалик фойдаланувчиларига оид маълумотларни беришга мажбурлаши мумкин. Апрел ойида ҳужжат АҚШ президенти Жо Байден томонидан имзоланган, январ ойида, Трамп инаугурациясидан олдин эса АҚШ Олий суди мазкур қонунни қўллаб-қувватлаган эди.

20 январ куни ўтказилган инаугурациядан кейин Трамп АҚШ бош прокурорига қонуннинг кучга киришини 75 кунга кечиктиришни буюрди. У TikTok ўз акцияларининг 50 фоизини Америка компанияларига топширса, АҚШ ҳудудидаги фаолиятини давом эттириши мумкинлигини маълум қилган эди.