АҚШ суди AP'нинг Овал кабинетга кириш ҳуқуқини тиклашни буюрди

АҚШ суди Оқ уйга Associated Press (AP) журналистларининг Овал кабинет, Air Force One президент самолёти ва бошқа жойларга киришини тиклашни буюрди — бунда улар бошқа журналистлар учун ҳам очиқ бўлиши ҳисобга олинади. Федерал судя Тревор Макфадден 8 апрел, сешанба куни ўз қарорини қабул қилишда сўз ва матбуот эркинлигини кафолатловчи АҚШ Конституциясига киритилган Биринчи тузатишга таянганини айтди.

Судя Макфадденнинг айтишича, АҚШ Конституциясига кўра, агар ҳукумат баъзи журналистларга эшикни очиб қўйса, унда бошқаларига қарашлари туфайли уни ёпа олмайди.

Ҳукумат 13 апрелгача апелляция шикояти бериши керак.

Associated Press ходимларига феврал ойи ўрталарида Оқ уйнинг Овал кабинети ва "1-рақамли борт"га кириши тақиқланган эди, чунки таҳририят Трампнинг буйруғига қарамай, ўз нашрларида Мексика кўрфази номини Америка кўрфазига ўзгартиришдан бош тортди. Оқ уй матбуот хизмати агентликни «дезинформация»да айблади.

Ушбу қарор туфайли AP 21 феврал куни АҚШ президенти Доналд Трампнинг уч юқори мартабали ёрдамчиси (Оқ уй аппарати раҳбари Сюзан Уайлс, унинг ўринбосари Тейлор Будович ва Оқ уй матбуот котиби Кэролайн Ливитт)га қарши судга даъво аризаси берди. Даъво аризасида Овал кабинетга ва президент самолёти бортига киришнинг рад этилиши АҚШ Конституциясига киритилган биринчи тузатишни бузганлиги айтилган, бу энди федерал судя Тревор Макфадден томонидан тасдиқланди.