АҚШнинг Хитойга божлари 9 апрелда 104 фоизгача кўтарилади

Доналд Трамп Хитойдан келадиган товарларга 34 фоиз билан бир вақтда 50 фоизлик божлар жорий этиш ҳақидаги таҳдидидан ҳам воз кечмади. Мавжуд тўловлар билан биргаликда уларнинг ҳажми 104 фоизга ошади.

Фото: Leah Millis / Reuters

АҚШнинг Хитойдан келадиган товарларга янги тарифлари 9 апрел ярим тунда (Тошкент вақти билан 9:00) кучга киради. 8 апрел, сешанба куни Оқ уй матбуот котиби Кэролайн Ливитт маълум қилишича, АҚШ президенти Доналд Трамп ушбу чораларни кечиктириш ҳақида ўйламаяпти.

Шундай қилиб, Хитойдан АҚШга импорт учун махсус савдо божлари 104 фоизни ташкил қилади, дея қўшимча қилди у. Ливиттнинг айтишича, Трамп Хитойнинг АҚШ билан келишувга эришиш истагини кўряпти. Пекин жавоб қайтаришда хатога йўл қўйди, чунки «Америка ҳужумга учраганда, у янада қаттиқроқ ҳужум қилади», деди Оқ уй матбуот котиби.

Трамп Вашингтон ва Пекин келишувга эришмоқчи, аммо буни қандай амалга оширишни билмайди деб ҳисоблайди, деди Ливитт. Шу билан бирга, Трамп «Хитой унга қўлини чўзса, илтифот кўрсатишга» ваъда берди ва Пекиндан қўнғироқни кутмоқда, дея қўшимча қилди у.

Бир кун аввал Трамп Хитой билан тарифлар бўйича кейинги музокараларни рад этди ва Хитойга янги қаттиқ савдо йиғимлари билан таҳдид қилди. Агар Пекин 8 апрелгача Америка товарларига 34 фоизлик божларни бекор қилмаса, АҚШнинг Хитой импортига 50 фоизлик божлари 9 апрелдан кучга киради, дея огоҳлантирди у.

Трампнинг савдо уруши. Бу жаҳон иқтисодиётини таназзулга олиб келадими?

#АҚШ #Хитой #савдо уруши