Дунё миллиардерларининг бойлиги бир кунда рекорд даражада — 304 млрд долларга кўпайди

Bloomberg Billionaires Index рейтингига киритилган миллиардерларнинг умумий бойлиги 9 апрел куни 304 миллиард долларга ошди. Бунга Доналд Трамп қатор давлатларга нисбатан божларни тўхтатиш бўйича қарор қабул қилганидан кейин фонд бозоридаги кўтарилишлар сабаб бўлди.

Bloombergʼнинг ёзишича, бу 2012 йилдан бери тузиб келинаётган индекс тарихида миллиардерларнинг умумий бойлигини бир кунда энг кўп ошиши ҳисобланади. Рейтингдан ўрин олган дунёнинг энг бадавлат 500 кишисининг бойлиги ўртача 3,5 фоизга ошган.

Энг кўп фойдани Илон Маск кўрган — унинг бойлиги бир кунда 36 миллиард долларга ошган. Ундан кейинги ўринни Meta раҳбари Марк Цукерберг эгаллаган — 26 миллиард доллар. Nvidia бош ижрочи директори Женсен Хуангнинг бойлиги эса 15,5 миллиард долларга ошган.

Фоизлар ҳисобида энг кўп фойдани Carvana раҳбари Эрнест Гарция III ишлаб олган. Унинг бойлиги 25 фоизга — 1,4 миллиард долларга ошган.

Бир кунлик ўсишга оид бундан олдинги рекорд (233 миллиард долларлик) 2022 йил март ойида ўрнатилган эди. Ўшанда АҚШ Федерал захира тизими Жером Пауэлл фоиз ставкасини узоқ йиллардан кейин биринчи марта оширганди.

АҚШ президенти Доналд Трамп 9 апрел куни дунёнинг кўплаб давлатларидан импорт қилинадиган товарларга жорий этилган божларни 90 кунга тўхтатишини эълон қилди. Ушбу баёнотдан кейин S&P 500 индекси 2008 йилдан бери энг катта ўсишни кўрсатди.