Ifo бош директори янги глобал иқтисодий инқирозни истисно этмади

Мюнхен Иқтисодий тадқиқотлар институти (ifo) протекционизм кучайиб бораётган бир шароитда янги глобал иқтисодий инқироз юзага келиши эҳтимоли ҳақида огоҳлантирди. «Афсуски, буни инкор этиб бўлмайди», деди ifo бош директори Клеменс Фюст 11 апрел, жума куни чоп этилган Süddeutsche Zeitung газетасига берган интервюсида.

Унинг сўзларига кўра, Қўшма Штатлар ўз ўзидан жаҳон иқтисодиётини инқирозга солиб қўймайди. «Агар протекционизм Хитойда ҳам, Европада ҳам тезроқ тарқалса, бу катта хавф туғдиради. Агар ҳамма нотўғри йўлдан кетса, бу жиддий инқирозга олиб келиши мумкин», деди у.

Шу билан бирга, Фюстнинг таъкидлашича, америкаликлар ҳозирда ишончли ҳамкор сифатидаги обрўсини йўқ қилмоқда. «Бу хавфли, чунки АҚШ ҳали ҳам дунёдаги энг муҳим иқтисодий кучдир», деди ifo раҳбари.

Ҳозир содир бўлаётган нарса бутун дунё учун «хавотирли қўнғироқ», дея қўшимча қилди у. «Дунё капиталлашувининг учдан икки қисми Америка фонд бозорига тўғри келади, доллар эса дунёнинг захира валютаси ҳисобланади. Агар буларнинг барчаси қулаб тушса, олдиндан айтиб бўлмайдиган оқибатлар бўлади», — дея огоҳлантирди Фюст.