Россия тинчликка эришиш учун Украинадан аннексия қилинган ҳудудларни сўради

Украина агар тинчликка эришмоқчи бўлса, Россия томонидан аннексия қилинган ҳудудлар – Қрим, Донецк, Луганск, Херсон ва Запорожие вилоятларидан воз кечиши керак. Бу ҳақда Россия Ташқи разведка хизмати (СВР) директори Сергей Наришкин маълум қилди.

Унинг сўзларига кўра, келишув шартлари Россиянинг «суверенитетини ва ҳозирги ҳудудий чегараларини тан олишни» назарда тутади.

Бошқа талаблар қаторида у Украинанинг «ядросиз ва нейтрал мақоми», шунингдек, «демилитаризация ва денацификация»ни келтирди. Бундан ташқари, Россия 2014 йилдаги «давлат тўнтаришидан» кейин Киев томонидан қабул қилинган «барча камситувчи қонунларнинг бекор қилинишига» интилади, деб қўшимча қилди Наришкин.

2025 йил февраль ҳолатига кўра, Россия Луганск вилоятининг 98,6 фоизини, Донецкнинг 62,6 фоизини, Запорожиенинг 71,9 фоизини ва Херсоннинг 69,3 фоизини назорат қилмоқда. Бундан ташқари, охирги иккитасида у вилоят марказларини назорат қилмайди – Запорожие (урушгача бўлган даврда аҳолиси 706 минг киши) ва Херсон (275 минг киши).

Аввалроқ, Россия ташқи ишлар вазири Сергей Лавров ва Хавфсизлик Кенгаши раиси Сергей Шойгу Украинадан ушбу ҳудудларни тўлиқ топширишни талаб қилган эди. Шунингдек, президент Владимир Путин ҳам шуни талаб қилди.

Апрель ойида Яқин Шарқ бўйича АҚШ махсус вакили ва Россия билан Украина бўйича музокараларнинг асосий иштирокчиларидан бири Стив Уиткофф АҚШ президенти Доналд Трампга тинчликка эришиш учун ушбу ғояни қўллаб-қувватлашни таклиф қилди. Бироқ, Трамп ҳали бу ҳақда қарор қабул қилмади.